西檸雞

受阿爺廚房影響, 一連幾日都係咁整鼎爺既餸, 尋晚仲整左西檸雞, 雖然冇跟足鼎爺既步驟, 但都好好味, 酸酸甜甜咁, 好下飯好開胃~而且用料簡單, 晌屋企都好易整到! (當然我冇鼎爺咁pro啦~)

材料:
雞扒 2件
凍滾水 1碗
麥芽糖 1.5湯匙
檸檬汁 適量
生粉 適量

醃料:
糖 1.5茶匙
鹽 1茶匙
油 適量

做法:
1. 雞扒切件加入醃料拌勻, 醃大約半小時
2. 雞件撲上生粉, 落滾油炸熟後撈起 (記住要慢火燒熱D油, 避免太高溫, 外面燶左裡面都未熟透)
3. 用凍滾水煮溶麥芽糖, 之後逐小加入檸檬汁, 調較到自己喜歡既酸甜度 (我自己大約加左一湯匙左右)
4. 個汁煮到開始有D稠既時候, 加入雞件兜勻上碟

家常小菜(1)~薑蔥粉絲蟹鍋

又好耐都冇update, 除左懶, 就係因為忙...呢排唔知點解好多野做, 忙到冇時間+冇心機諗煮咩餸~~好彩尋日得閒D, 所以尋晚就整左個薑蔥粉絲蟹鍋, 見個雪櫃又有D蘑菇, 又整左個芝士牛肉焗釀小蘑菇, 再烚多碟菜就可以開飯!

薑蔥粉絲蟹鍋
材料:
肉蟹 1隻 (約1斤)
泰國粉絲 1包
京蔥 1條
薑片 8-10片
蒜茸 1茶匙
炸蒜, 炸蔥頭 各1茶匙 (可以唔加)
肥豬肉 1舊

調味料:
雞湯 150ml
蠔油 1湯匙
XO醬 1湯匙

花雕酒 1茶匙

醃料:
生粉 1湯匙
花雕酒 1湯匙
胡椒粉 1茶匙
雞粉 1茶匙

做法:

1. 肉蟹用刷洗淨, 先斬去蟹箝 (記得唔好拆繩, 連繩斬蟹箝, 如果唔係, 好易俾蟹箝到手) , 拍一拍, 之後蟹身去肺斬件

2. 之後入醃料 (生粉除外) 拌勻
3. 粉絲浸軟, 京蔥切段備用
4. 燒熱鐵鍋加入肥豬肉, 爆到出油之後, 蟹件略拍上生粉煎香 (如果想效果更好, 可直接燒一鍋油將蟹件走油, 但我怕太油膩, 所以用煎的方式)
5. 將蟹件撈起, 原鍋加入京蔥, 薑片及蒜茸炒香
6. 加入粉絲略兜後, 蟹件回鍋兜勻, 再放入所有調味料, 蓋上鍋蓋中火煮到收汁
7. 最後灑上炸蒜及炸蔥頭即成

朋友的生日飯

唔經唔覺, 我的悠長假期就咁就完左, 又係時候返工搵錢了! 放左10日假...我既腦海只係想到係咁煮野食~~而且撞岩中秋節, 做節飯都煮左2餐, 其中仲要有一餐要煮20人飯, 都真係有D辛苦!

上星期六有朋友入黎食飯, 4個人食, 整左4個菜+1個冷盤, 當然係食唔晒~~最後朋友要打包左半隻雞走!

介紹下先:

左上: 青醬炒青口扁意粉

唔知點解影出黎有D似係伊麵, 第一次整都算OK, 做法亦非常簡單,

首先要烚熟D意粉, 之後將解凍左既青口加蒜茸落鑊炒香, 

再將意粉回鑊, 加入一大茶匙既青醬及少許鹽, 兜勻便可上碟

左中: 慢煮豉油雞

阿媽教落生日要有雞! 慢煮煮得十分滑，雞胸都好juicy

首先要洗淨冰鮮雞 (我晌一田買鳳江雞, 幾好食的)

放入真空袋, 加入180ml生抽, 20ml老抽, 水200ml, 30g冰糖, 香葉及薑數片, 蔥頭4粒, 蔥1棵,

之後抽真空seal好, 70度慢煮3個半鐘就可以斬件上碟

左下: 涼拌茄子

幾碟餸中最簡單的一道, 酸酸地又有D辣好開胃, 

洗淨一條茄子後切條, 煮滾一鍋水, 加入2湯匙白醋後加入茄子煮 (其間不時攪拌一下)

煮5分鐘後熄火, 將茄子倒入冰水中冷卻, 之後排好放入雪櫃, 食之前淋上汁料

汁料方面用左豉油1湯匙, 浙醋3湯匙, 糖2茶匙, 麻油2茶匙, 辣椒油(連渣)1茶匙, 蒜蓉1茶匙

(可以一路試味一路adjust)

右上: 洋蔥煙肉芝士烤菇

呢個又係冇咩難度, 將燒烤菇去蒂放晌焗盤上,

煙肉及洋蔥切粒炒香, 釀在燒烤菇中, 

再加上芝士及蛋黃醬焗10分鐘就得 (我用左Parmesan同mozzarella)

右下: 威靈頓牛柳 

整左幾次, 最成功係今次 (總算冇失威吧!?)

秘訣真係在於個蘑菇碎要炒得夠乾身, 

詳情可以參閱返威靈頓牛柳

大功告成的一餐, 衷心祝朋友生日快樂, 同埋快D揀好日子拉埋天窗
(可惜只影了2張相, 唯有下次整既時候補拍)

韮菜煎粿

失驚無神想食煎粿, 二話不說就去買料整, 第一次整不過不失, 煎既技巧可以再好D, 味道也不錯!

材料(皮):
澄麵 200g
糯米粉 1湯匙
生粉 1湯匙
水 220ml
菜油/豬油 1.5湯匙
鹽 1茶匙

材料(餡):
韮菜 200g
半肥瘦豬肉 $15

醃料:
麻油 1.5茶匙
鹽 1茶匙
雞粉 1茶匙
糖 1茶匙
胡椒粉 少許

做法:
1. 半肥瘦豬肉剁碎, 之後加醃料醃半個鐘
2. 水加入菜油/豬油及鹽煮滾後, 撞入澄麵撈勻

3. 加入生粉及糯米粉, 搓成糰至表面光滑, 攤凍備用

4. 韮菜切粒, 灑少少鹽撈勻, 過5分鐘後揸乾水, 拌入豬肉成餡料

5. 取出適量煎粿皮, 包入一湯匙餡料 (每份煎粿皮大約比一粒核桃大少少)

6. 準備平底鍋, 燒滾適量油, 放入包好的粿 (收口面先向下, 之後輕按成餅形), 煎至兩邊金黃即成.

P.S.
煎粿既時候盡可能每個粿之間也留有少少空位 (唔好好似我咁堆得咁密), 如果唔係就會好難翻轉另一邊煎, 同時粿皮熟時會黐埋, 翻轉時好易會穿.

惹味口水雞

前幾晚見到肥媽整口水雞, 自己都忍唔住試下整, 今次整呢個口水雞, 真係大成功, 最滿意既地方唔係個汁調得好, 而係今次成功排返好隻雞, 唔係散修修一岩一忽咁......真係令我好開心.....

加埋個汁就開得飯!

材料:
雞 半隻 (我晌一田買左隻鳳江雞, 半隻既size大約係3-4人份量)
青瓜 1條 (墊底用)
薑 4片
蔥 1小棵 (切段)
紹興酒 1湯匙
鹽 1茶匙
雞粉 1茶匙
芫茜 1棵 (切碎)
白芝麻 2湯匙

汁料:
麻辣醬 1.5湯匙
麻醬 2湯匙
鎮江醋 2湯匙
蒜茸 1.5茶匙
生抽 1湯匙
麻油 1湯匙
紹興酒 1茶匙
糖 1茶匙

(以上汁液可根據自己口味自行調整, 可以一邊整一邊試味, 試到覺得岩味為止)

做法:
1. 雞洗淨抹乾, 用紹興酒, 鹽及雞粉搽勻略醃, 加上薑蔥, 之後放入水波爐, steam mode蒸25-30分鐘

2. 白芝麻炒香至金黃色, 取出2/3磨成蓉, 剩下的留起備用

3. 將芝麻蓉加入所有汁料中拌勻成口水雞汁, 放入雪櫃雪一陣
4. 青瓜洗淨用廚房機刨成絲, 舖在碟底備用

5. 預備一盤冰水, 雞蒸好後馬上放入冰水中 (蒸雞既雞汁留起)

6. 待雞完全冷卻後, 取出抹乾, 切件放於青瓜絲上

7. 雞面灑上芫茜碎及剩下既芝麻, 口水雞汁取出, 拌入蒸雞既雞汁攪勻, 淋上雞面即成

P.S.
1. 雞要視乎大細而調整蒸既時間, 今次蒸左半個鐘, 雞脾位僅熟, 但雞骨仍紅的
2. 如果沒有廚師機, 可以就咁將青瓜切絲, 但建議盡量切幼D, 可以吸多D汁
3. 若時間上許可, 可以切左雞之後再雪多一陣倏個冷盤, 岩晒夏天食
4. 如果想雞排得靚D, 建議可以用剪骨刀去剪雞. 因為若果用刀斬, 好多時未必夠力一刀過, 以致有碎骨或者斬得唔靚, 用剪既方法會更易掌握及砌返個形出黎
5. 如果唔鍾意咁惹味, 可以唔用口水雞汁, 改配薑蓉便成白切雞

辣酒煮花螺

呢排日日都掛住捉精靈, 少左update下個blog, 係時候的起心肝做下野...

材料:
花螺 1斤
油 2湯匙
花椒 1湯匙
八角 3-4粒
薑 4片
辣豆板醬 1.5湯匙
辣椒 2隻
蠔油 1湯匙
蒜茸 1湯匙
蔥/芫茜 1棵 (切段)

汁料:
花雕酒 160ml
米酒 40ml
玫瑰露 2湯匙
雞湯 200ml

做法:
1. 花螺洗淨, 開一鍋水加2片薑煮滾, 將花螺略灼 (大約4-5分鐘), 之後隔水瀝乾

2. 先加油燒熱小鍋, 之後加入花椒八角炒香

3. 聞到香味後可加入薑片, 蒜茸及辣椒粒

4. 之後加入花螺, 豆板醬及蠔油兜勻

5. 加入汁料, 滾起後煮約10分鐘, 最後加上蔥段/芫茜即成.

咸菜胡椒豬肚湯

好耐冇食過豬肚雞煲,
不過以我既功力, 應該仲未可以自己整到,
唯有整個咸菜胡椒豬肚湯頂下癮先~~  

材料:
豬肚 1個
咸菜 半舊 (約250g)
排骨 半斤
薑 5-6片
白胡椒粒 1.5湯匙 (略為拍碎)
水 3湯碗(大約10個飯碗左右)
花雕 1湯匙

用具:
Staub 26cm round cocotte

做法:
1. 豬肚買返黎要洗肚淨, 豬肚外面既白色肥膏要剪走 (箭咀所指既物體)

2. 之後就係反轉豬肚, 用鹽同生粉洗, 起碼洗3次, 黃色既野都要洗走 (呢個步驟係最最最核突的!)

3. 開一煲水煮滾, 加花雕同2片薑, 將排骨及豬肚出水 (約3分鐘左右)
4. 撈起排骨及豬肚, 將豬肚用凍水沖洗

5. 將豬肚切件 (記得唔好切得太細塊, 因為煲左之後會縮, 切得太細塊縮埋之後就真係冇野好食!)

6. 之後落少少油晌煲度, 加薑片及白胡椒炒香, 之後加入排骨及豬肚略炒

7. 當豬肚開始出水時, 可以加入3湯碗水, 煲大約1小時
8. 同時間, 咸菜可以切小塊浸水約30分鐘, 之後瀝乾
9. 1小時後, 可以加入咸菜滾多20分鐘就得

炒碟菜, 煎D雞翼, 輕輕鬆鬆又一餐了!

冬瓜花蛤肉片湯 + 無水咖哩牛肋肉

前晚捱夜睇波, 尋晚決定是是但但煮D野, 滾左個冬瓜花蛤肉片湯, 呢個湯消暑下火, 味道真係好好好清甜~~如果想再簡單D, 用個湯黎整泡飯食都得!

上星期晌上環買左D花蛤乾, $58一斤, 都幾大隻, 陣味仲好香...好可惜, 只適宜用黎出味, 因為都幾多沙 (幾乎隻隻都有沙)...唔建議食囉~~

冬瓜花蛤肉片湯 (3-4人份)
材料:
冬瓜1斤
瘦肉約200g
花蛤乾約20隻
薑 3片
水 2L

做法:
1. 冬瓜洗淨去皮去籽切件
2. 瘦肉洗淨切片
3. 花蛤乾用清水浸一浸 (約5分鐘左右就得)
4. 水放薑片煮滾, 之後放晒所有材料, 用慢火滾約20-25分鐘, 最後用鹽調味便可

(如果想食埋花蛤肉, 又或者買唔到花蛤乾, 都可以用新鮮花蛤代替, 但記得要吐沙!)

只係一個湯加飯係滿足唔到我同張生的, 所以, 同場加映, 無水咖哩牛肋肉! 又係清雪櫃之作, 真係要耐唔耐清下個雪櫃, 先有更多既空間買新野試!!

呢個咖哩既特色係完全冇加過水, 只用了少量椰漿, 其他既水份係來自食材既本身. 而用既藍象curry paste, 係之前托朋友晌泰國買, 呢一款massaman curry, 味道比較溫和微辣, 如果鍾意辣D既, 可以用red curry paste或yellow curry paste代替

無水咖哩牛肋肉
材料:
牛肋肉 6-7條 (視乎長短, 總之總共可切成十幾小塊就OK)
蕃茄2個 (中size)
薯仔1個 (大size)
藍象massaman curry paste 1包 (70g)
椰漿200ml
(留意返, curry paste包裝係用400ml的, 但呢個咖哩只係用200ml!!!)

架生:
Staub 23cm oval cocotte

做法:
1. 牛肋肉解凍後, 切成小件拖水, 瀝乾備用
2. Staub凍鍋落油, 慢火加熱, 之後加入curry paste炒香
3. 椰漿分3次落, 每次落完都要兜勻, 炒至有咖哩油出.
4. 咖哩同椰漿炒勻後轉最細火, 先加牛肋肉晌底兜一兜, 之後中間果層放薯仔, 最面一層放蕃茄, 然後冚蓋煲10分鐘.
5. 10分鐘後開蓋, 兜勻所有材料, 再冚蓋煮多20分鐘就得

斬料...斬料...斬大舊叉燒

為左自制三寶飯, 決定了一次過整燒腩仔同叉燒, 再加埋隻酒香咸蛋...諗起都流口水呀!叉燒做叉非常簡單, 自己整又可以自己決定幾肥幾瘦, 而且瘦果D位唔似得街外買果D, 一D都唔"鞋"口!

材料:
梅頭豬肉 半斤 (要半肥瘦!)

醃料:
玫瑰露 1湯匙
花雕 1湯匙
生抽 2茶匙
蜜糖 2茶匙
叉燒醬 3湯匙

做法
1. 將所有醃料加入密實袋中拌勻

2. 豬肉洗乾淨瀝乾水後, 加入盛有醃料的密實袋中, 之後封口放入雪櫃醃過夜

3. 焗之前預備好錫紙, 將豬肉連醃料一同放在錫紙上包裹好! (最好用2層錫紙, 以防醃料漏出來)

4. 水波爐用superheated steam mode, 預熱220度, 入爐焗40分鐘
5. 之後取出打開, 將豬肉翻轉, 焗多20分鐘

6. 焗好之後取出切件

真係件件都好JUICY嫁~!

水波爐脆皮燒腩仔

媽媽經常同我呻, 話依家百物騰貴, 買舊燒肉拜神, 閒閒地都百幾蚊, 仲要係執皮唔脆, 拜完神都唔想食果種!! 我都係一個師奶, 又點會唔知呀, 於是晌網上參考下人地D食譜, 俾我試到呢個勁脆皮燒腩仔~~(我用既係雪藏腩肉, 圖中所見既成本只係廿幾蚊!)

材料:
豬腩肉 600-700g
粗鹽 100g
薑 3片
蔥 1札
紹興酒 1湯匙

醃料:
鹽 1茶匙
五香粉 1茶匙
紹興酒 1.5茶匙

做法:
1. 豬腩肉解凍洗淨 (如採用新鮮豬肉, 簡單洗淨便可)
2. 開一鍋水燒滾, 加入薑, 蔥及紹興酒, 放入豬肉一齊煮15分鐘 (豬皮向下)

3. 豬肉盛起用過濾水沖至冷卻

4. 瀝乾後用肉插於豬皮上插小孔 (如果沒有肉插, 可用叉代替, 但會較為吃力)

5. 豬肉搽勻調味料 (豬皮除外) 置於雪櫃中醃一晚

6. 水波爐 (superheated steam mode) 預熱220度, 豬肉用錫紙包好 (豬皮除外), 豬皮面舖上材料中的粗鹽 (此步驟要非常小心, 避免鹽跌落豬肉中, 令豬肉過咸), 之後便可入爐焗30分鐘

7. 30分鐘之後, 豬肉取出除去豬皮上的粗鹽, 用convection mode, 250度焗10分鐘
8. 10分鐘後, 再轉用grill mode, 焗多15分鐘即成