慢煮香草豬鞍架伴黑醋蘋果茸

買左舊豬鞍架3個星期, 一直都未有機會整...真係太太太太太忙! 星期六終於的起心肝溶左雪, 再用埋鄰居送既香草 (恕我愚昧, 唔知隻香草叫咩名), 掉左落去慢煮, 整埋個黑醋蘋果茸, 味道唔錯, 但好可惜....煮過龍! 略嫌鞋口~~(始終係豬, 內心硬係覺得要浸耐D~@@~下次唔會呢~)

材料:
豬鞍架 2件
香草 適量 (可用rosemary或thyme)
鹽 1茶匙
油 半湯匙

蘋果茸材料:
蘋果 (中size) 1個
黑醋 3湯匙
蘋果醋 2湯匙
糖 1-2茶匙

伴碟:
蘆筍 4條

豬鞍架做法:
1. 豬鞍架溶雪洗淨抹乾備用
2. 香草切碎, 跟豬鞍架, 鹽及油一起放入真空袋中, 之後抽走空氣封口
3. 慢煮2小時 (其實1.5小時已OK!)
4. 取出豬鞍架, 煎香2面即可

**煎完唔洗洗鍋住, 用黎炒埋個蘆筍先!

蘋果茸做法:
1. 蘋果去皮去芯磨茸
2. 平底鍋燒熱, 放入所有材料拌勻, 糖可自行加減至適合自己口味
3. 煮至收汁便可

蘆荀做法:
1. 蘆筍削去面層切段 (面層太老, 食起來會有"渣", 如果用BB蘆筍就可省去此步驟)
2. 燒返熱剛材煎豬鞍架的鍋, 加入蘆筍, 再加入鹽和黑椒調味即可

朋友的生日飯

唔經唔覺, 我的悠長假期就咁就完左, 又係時候返工搵錢了! 放左10日假...我既腦海只係想到係咁煮野食~~而且撞岩中秋節, 做節飯都煮左2餐, 其中仲要有一餐要煮20人飯, 都真係有D辛苦!

上星期六有朋友入黎食飯, 4個人食, 整左4個菜+1個冷盤, 當然係食唔晒~~最後朋友要打包左半隻雞走!

介紹下先:

左上: 青醬炒青口扁意粉

唔知點解影出黎有D似係伊麵, 第一次整都算OK, 做法亦非常簡單,

首先要烚熟D意粉, 之後將解凍左既青口加蒜茸落鑊炒香, 

再將意粉回鑊, 加入一大茶匙既青醬及少許鹽, 兜勻便可上碟

左中: 慢煮豉油雞

阿媽教落生日要有雞! 慢煮煮得十分滑，雞胸都好juicy

首先要洗淨冰鮮雞 (我晌一田買鳳江雞, 幾好食的)

放入真空袋, 加入180ml生抽, 20ml老抽, 水200ml, 30g冰糖, 香葉及薑數片, 蔥頭4粒, 蔥1棵,

之後抽真空seal好, 70度慢煮3個半鐘就可以斬件上碟

左下: 涼拌茄子

幾碟餸中最簡單的一道, 酸酸地又有D辣好開胃, 

洗淨一條茄子後切條, 煮滾一鍋水, 加入2湯匙白醋後加入茄子煮 (其間不時攪拌一下)

煮5分鐘後熄火, 將茄子倒入冰水中冷卻, 之後排好放入雪櫃, 食之前淋上汁料

汁料方面用左豉油1湯匙, 浙醋3湯匙, 糖2茶匙, 麻油2茶匙, 辣椒油(連渣)1茶匙, 蒜蓉1茶匙

(可以一路試味一路adjust)

右上: 洋蔥煙肉芝士烤菇

呢個又係冇咩難度, 將燒烤菇去蒂放晌焗盤上,

煙肉及洋蔥切粒炒香, 釀在燒烤菇中, 

再加上芝士及蛋黃醬焗10分鐘就得 (我用左Parmesan同mozzarella)

右下: 威靈頓牛柳 

整左幾次, 最成功係今次 (總算冇失威吧!?)

秘訣真係在於個蘑菇碎要炒得夠乾身, 

詳情可以參閱返威靈頓牛柳

大功告成的一餐, 衷心祝朋友生日快樂, 同埋快D揀好日子拉埋天窗
(可惜只影了2張相, 唯有下次整既時候補拍)

慢煮BBQ醬燒豬仔骨

有好朋友上黎食飯, 緊係攪D新意思, 試下慢煮18個鐘豬仔骨, 睇下係咩鬼樣先得~~(老友黎食飯當然係要做下白老鼠~~)

材料:

豬仔骨 1.5磅 (大約5-6條骨)

洋蔥 半個

醃料:

BBQ醬 4湯匙

Oregano 2茶匙

紅椒粉 1.5茶匙

蜜糖 1湯匙

蒜蓉 1.5茶匙

做法:

1. 豬仔骨洗乾淨抹乾備用

2. 準備可以慢煮既膠袋, 將所有醃料加入攪勻

3. 將豬仔骨放入袋中, 之後抽真空封口

4. 慢煮機調至70度, 時間set為18小時, 之後可加入豬仔骨開始煮

5. 18小時後, 可將豬仔骨盛起

6. 將洋蔥切條, 舖在skillet或焗盤上, 可加上少許橄欖油, 鹽和黑椒

7. 將豬仔骨從袋中取出, 放在洋蔥上, 慢煮袋中的汁盛起, 先將一面豬仔骨搽滿汁

8. 水波爐調至grill mode, 將豬仔骨放入, 烤10分鐘

9. 10分鐘後, 豬仔骨翻轉另一面, 再搽滿汁, 再烤多10分鐘即成

今晚除左有豬仔骨, 仲有XO醬炒西蘭花, 白灼蝦, 蒸咸蛋, 同埋節瓜薏米蜆仔湯, 大家都食到好飽~~~個骨好juicy, 一D都唔"鞋", 肉質夠淋, 而且好友十分欣賞我既自家制咸蛋, 所以給了2隻她外帶回家, 與家人分享!!

P.S.

1. 墊底的配菜可自行配上, 不一定要洋蔥, 例如可以配上彩椒, 但不建議用上太多汁液既蔬果 (例如蕃茄), 因為太多汁可能會令豬仔骨烤出黎唔夠乾身

2. 如果不嗜甜的, 醃料可省卻蜜糖

慢煮青邊鮑伴藜麥汁薯蓉

網上見到D谷友整慢煮青邊鮑整得咁過癮, 我當然唔執輸整埋一份啦~~整完之後仲要懶醒學人黎個fusion...不過今日我只係簡單講下個青邊鮑點攪, 俾我偷懶下, 尋晚歐國盃決賽通頂左半晚, 一路直落到依家, 好眼瞓呀!

慢煮青邊鮑
材料:
急凍青邊鮑魚 2隻
(今次用既大約係半隻手掌咁大既鮑魚)

架生:
Anova 慢煮機

做法:
1. 青邊鮑解凍擦乾淨

2. 將青邊鮑放入耐熱的密實袋內抽真空

3. 慢煮機set 75度, time set 30小時, 待水溫到75度後, 可放入青邊鮑

4. 這是青邊鮑煮了18小時後的樣子, 可以拎出黎按一按中間, 睇下有幾"淋", 再決定煮多幾多個鐘

5. 再煮多12個鐘後, 又再拎出黎, 再用手按下, 感覺夠"淋"既, 可以剪袋, 將汁同鮑魚分開

6. 最後用本身既鮑魚汁去調返個芡, 基本可落蠔油, 生抽, 生粉水, 淋上青邊鮑面即完成!

慢煮斧頭扒

搬了新屋, 少不色朋友歡聚house warming一下, 加上添置了不少新玩具, 當然要好好娛樂一下自己!!! 用慢煮斧頭扒去招呼朋友, 真係一D都唔失禮, 因為平時兩口子, 真的很難吃完咁大塊扒, 趁人多去整, 一人一件, 好快就消滅左!

食材:

斧頭扒一件 (約3-3.5吋厚, 連骨約3.5磅重)

調味料:

鹽, 黑椒適量

香葉數片

牛油2片

做法:

1. 斧頭扒置於雪櫃解凍1晚

2. 解凍後塗上鹽和黑椒, 最少醃2小時, 如時間許可, 可以醃過夜

3. 將牛扒放入耐熱袋中, 再加入牛油及香葉, 用抽真空機將袋中空氣抽出 (此步驟非常重要, 確保食物在慢煮期間不會接觸到細菌

4. 慢煮器設置溫度55度, 時間為3.5小時, 放入斧頭扒慢煮即可 (熟的程度係medium rare)

***完成慢煮後, 斧頭扒於食用前再略略煎香表面便可上碟***

***也曾經試過慢煮後, 將斧頭扒用來BBQ***

誘人的顏色喔~~~很juicy呢!!!

P.S.

1. 喜歡熟一點既朋友, 可將慢煮溫度提升至58度, 時間加多15分鐘, 那麼效果大致為7成熟

2. 斧頭扒骨過長的話, 可以要求凍肉店店員幫忙鋸斷, 如果唔想失去斧頭的"視覺效果", 亦可以於慢煮後, 用火鎗燒支骨, 燒到沒有血水滲出便可

3. 要留意慢煮溫度, 愈接近水面, 水既溫度就愈低, 肉亦不易做到理想中的生熟程度, 可嘗試蓋上一層錫紙於煲面, 確保溫度平均之餘, 煲中既水份就不易流失, 這樣亦可解決加水後溫度驟跌既影響

新玩具

好耐冇update了, 要勤力D先得呀!!! 呢段時間我也沒有偷懶, 只係太多野攪, 淨係搬屋都纏繞左好一段時間! 不過呢....晌呢段時間裡面, 我又收到好多新玩具...例如有BOSCH廚師機


ANOVA慢煮神器


仲有kenwood三文治機~~


真係呢....個廚房就黎爆咁滯呀!! 不過我都好開心既...因為有咁多新玩具俾我玩, 真係可以一日到黑匿埋晌廚房玩到天昏地暗呀! 等我遲D再介紹下我用左D新玩具整左D咩"傑作"啦!