古早味蛋糕

呢排我好鍾意整古早味蛋糕, 冇牛油, 只用植物油, 感覺健康D! 而且質地好濕潤, 一D都唔會乾爭爭, 忍不住食完一件又一件!

材料:
植物油 50g (我用芥花籽油/ 橄欖油)
鮮奶 40g
蛋黃 4隻
低筋麵粉 60g
砂糖 50g
蛋白 4隻
幼鹽 1/4茶匙

做法:
1. 用最細火將植物油煮熱 (煮到有油紋就得, 唔好太熱), 之後加入低筋麵粉攪拌

2. 之後加入蛋黃及鮮奶攪拌, 攪拌完成後應該係糊狀, 如果油太熱的話, 攪拌出來會變成麵糰, 咁就整唔到嫁啦!

(完成攪拌後既形態)

3. 蛋白加鹽攪拌到起泡, 然後加糖打至企身, 將1/4既蛋白加入蛋黃麵糊內拌勻

4. 將麵糊倒入剩餘的蛋白內拌勻, 同時焗爐預熱150度
5. 將拌好的麵糊倒入模, 用水浴法焗60-70分鐘

6. 出爐啦....(今次爆左, 上次整得靚仔D!)

桃膠蜜桃燉蜂蜜

進入秋天總是要不停滋潤, 不斷外敷內服...除左敷MASK, 就係要食多D滋潤既食物, 尋晚就燉左個桃膠蜜桃燉蜂蜜, 除左滋潤生津, 強健脾胃, 仲有美肌功效的!

材料 (1個LC盅份量)
蜜桃 半個
桃膠 3粒
蜂蜜 1湯匙 (如不用蜂蜜, 可用冰糖代替)
蓮子, 百合  適量

做法:
1. 桃膠浸發最少8小時, 浸發後去雜質
2. 蜜桃去皮切開 (可切粒或切片)
3. 蓮子去芯, 百合略浸
4. 將所有材料加入燉盅, 注入清水, 燉約1.5小時即可

今次我係用左有蜂蠟既蜂蜜去燉, 所以燉完出黎都係有D蠟質, 可以用普通蜂蜜或冰糖取代, 如果用冰糖的, 可在完成前15分鐘先落, 試下個味先, 再決定落幾多 (因為蜜桃本身都有甜味)

滋潤糖水 + 燉湯

中秋過後, 開始要整多D潤燥既湯水/糖水, 如果唔係個人真係會好DRY! 所以前晚整左燉湯, 尋晚就整左糖水, 慎防DRY爆!

燉湯(1)-北芪黨參淮山燉豬展

材料: 紋黨4錢, 北芪5錢, 淮山4錢, 豬展肉2小塊
做法: 豬展出水, 黨參及北芪剪成小段, 同埋淮山一齊沖一沖水, 之後放晒入燉盅, 注入熱水於盅內燉2小時, 加鹽調味即可
功效: 補氣健脾, 改善氣虛, 增強呼吸道功能及抵抗力, 有助改善鼻敏感及氣管敏感徵狀

燉湯(2)-蓮子百合桂圓燉雞泡膠

材料: 蓮子, 百合, 桂圓各2錢, 杞子1錢, 雞泡膠2小件, 豬展肉2小塊
做法: 豬展出水, 雞泡膠浸軟, 其他材料洗淨, 全部放入燉盅,  注入熱水於盅內燉2小時, 加鹽調味即可
功效: 寧心安神, 清心除煩, 滋陰潤肺, 雞泡膠補氣明目, 有調理女性子宮功效

糖水: 雪梨無花果雪耳無花果糖水

材料: 南北杏3錢, 無花果8粒, 雪梨2個, 雪耳1朵
做法: 雪耳浸至軟身切成小塊, 雪梨去芯切件, 無花果及南北杏洗淨備用, 將全部材料放入鍋中加適量水, 大火煮滾後, 轉細火煮45分鐘, 加入適量冰糖調味即可
功效: 滋陰潤燥, 養肝明目

慢煮青邊鮑伴藜麥汁薯蓉

網上見到D谷友整慢煮青邊鮑整得咁過癮, 我當然唔執輸整埋一份啦~~整完之後仲要懶醒學人黎個fusion...不過今日我只係簡單講下個青邊鮑點攪, 俾我偷懶下, 尋晚歐國盃決賽通頂左半晚, 一路直落到依家, 好眼瞓呀!

慢煮青邊鮑
材料:
急凍青邊鮑魚 2隻
(今次用既大約係半隻手掌咁大既鮑魚)

架生:
Anova 慢煮機

做法:
1. 青邊鮑解凍擦乾淨

2. 將青邊鮑放入耐熱的密實袋內抽真空

3. 慢煮機set 75度, time set 30小時, 待水溫到75度後, 可放入青邊鮑

4. 這是青邊鮑煮了18小時後的樣子, 可以拎出黎按一按中間, 睇下有幾"淋", 再決定煮多幾多個鐘

5. 再煮多12個鐘後, 又再拎出黎, 再用手按下, 感覺夠"淋"既, 可以剪袋, 將汁同鮑魚分開

6. 最後用本身既鮑魚汁去調返個芡, 基本可落蠔油, 生抽, 生粉水, 淋上青邊鮑面即完成!

藜麥雪耳糖水

藜麥(quinoa),  因為個個都話營養價值高, 而且有豐富植物性蛋白質, 對食素既人黎講係好好既選擇 ****但我唔係茹素的****

老實講, 我大約食左半年, 唔覺得身體有咩變化
~~除左自我感覺良好左~~
不過, 對身體冇害既野, 而個個都話營養價值高既食品, Keep住食都OK既~~
平時我多數都係加埋落D飯度煮, 因為夠方便
不過人總係要試下新野既, 於是就整左個藜麥雪耳糖水

材料:
藜麥 4湯匙
雪耳 1朵
紅棗 4-5粒 (去核)
杞子 1湯匙
水 5-6碗 (上圖的飯碗size)
冰糖 適量

做法:
1. 雪耳浸發後洗淨並切成小塊
2. 水煲滾後, 加入雪耳, 紅棗及杞子, 煮大約10分鐘
3. 加入藜麥再煮多10分鐘
4. 最後加入冰糖調味
(圖中果碗我係加左冰糖+黑糖, 因為冰糖岩岩得返少少~~如果只用冰糖的, 應該唔會咁深色的)

同場加映, 尋晚為食蚊又要霸位食飯

"清清地"又一餐 :)

用鑄鐵鍋去煲粥, 其實一D都唔難, 煲出黎既粥仲好綿添!

材料:
米 1杯
水 10杯 (米同水比例為1:10)
海鮮 隨意 (今次用左2隻三點蟹, 同埋4隻貴妃蚌)
薑 3片 (切絲)

P.S. 我見個雪櫃有隻皮蛋, 順手加埋落去!

"架生":
Staub 26cm round cocotte
26cm 蒸隔

做法:
1. 米洗淨, 加少許油同鹽浸大約半個鐘, 海鮮洗淨備用
2. 水煮滾後, 加入薑絲同米, 中大火順時針攪5分鐘
3. 放上已擺左蟹既蒸隔, 加蓋轉極細火煮20分鐘
4. 20分鐘後, 移開蒸隔, 加入皮蛋用中火順時針攪5分鐘 (呢個步驟十分重要, 可以令個粥底收水變稠)

5. 將貴妃蚌放入蒸隔, 再將蒸隔放回鍋內

6. 轉返極細火煲多5-7分鐘, 唔好開蓋焗多5分鐘就得

P.S.
1. 放海鮮既次序跟返佢地既size去決定, 好似今次用左蟹同貴妃蚌, 所以蟹要放先, 蒸起碼20分鐘
2. 如果唔用海鮮, 普通整皮蛋瘦肉粥 (或其他材料既粥), 所有材料就會晌步驟(4)既時候加入
3. 處理步驟(4)時要小心, 因為粥逐漸變稠, 滾起上黎會愈來愈"彈", D粥好易彈到自己, 小心燙傷呀!

酒香咸蛋DIY

通常晌屋企, 最鍾意就係冇野搵野黎做, 所以屋企積積埋埋好多一樽二樽野! 最近就小試牛刀, DIY左幾隻酒香咸蛋, 尋晚蒸左一隻黎食, 真係不得了......味道同晌街賣既真係完全唔同, 除左咸香, 仲有酒香, 真係一食愛上! 我諗可以大量"生產"了~~

材料:
鴨蛋/ 雞蛋 4隻 (個人覺得鴨蛋係油香D, 但雞蛋會比較健康D)
鹽 100g
水 400g (鹽同水比例大約係1:4)
茴香籽 1茶匙
花椒 2茶匙
八角 3-4粒
香葉 數片
花雕酒 1湯匙
(如不喜歡酒香, 可省卻花雕酒, 只用香料, 製成五香咸蛋)

其他:
米酒 50ml

做法:
1. 將水煮滾, 加入鹽, 茴香籽, 花椒, 八角及香葉一同煮到鹽融化, 之後熄火待冷卻備用
2. 鴨蛋洗淨抹乾, 並小心檢查蛋沒有裂, 之後逐隻沾上一層薄薄的米酒, 放入一個已消毒的闊口樽內
3. 加入香料鹽水, 並且加入花雕酒, 要確保鹽水浸過蛋, 其間蛋會浮起, 可用豉油碟將蛋壓下

以上做法, 夏天大約浸泡20-25日已夠味, 冬天則要28-35日

21日後...

可取出一隻蛋蒸熟試味, 蛋既表面會有一層好似泥咁既野, 用清水洗, 捽一捽就會甩左, 之後就可以拎去蒸!

成品切開, 真係好夠油, 食落去仲會有陣陣酒香嫁

梅酒制作

幾個月前既作品~~(應該係3-4月左右)

材料:
青梅2磅
冰糖1磅 (可再酌量調整)
日本清酒/中國白酒 2L

做法:
1. 將玻璃樽洗乾淨 (最好消毒埋啦!) 記得用之前要徹底抹乾, 唔可以有水份
2. 青梅洗乾淨並除去蒂 (在水盤中加少少梳打粉, 將青梅浸一陣, 再捽下D青梅, 可以幫助除去面果D白色毛毛)
3. 風乾青梅, 確保每一粒都冇水份在表面
4. 青梅用叉/牙簽"吉"幾下, 放入樽內 (令到梅液滲出!)
5. 加入冰糖&酒, 密封好存放於陰涼地方

呢杯係今年浸泡的, 尋日拎出黎試味...DIY真係令我覺得好飲過CHXYA呀!!! (雖然其實應該要再浸耐D)