香芒大蝦米紙卷

好耐冇update...太懶同太忙...@@...夏日炎炎, 整D冷盤, 香芒大蝦米紙卷配上泰式酸辣汁, 開胃又醒神呀!!!

材料:
大蝦 10隻
呂宋芒 1個
小青瓜 1條
米紙 10片
蛋黃醬 適量 (可以唔加)

做法:
1. 大蝦挑腸後去殼洗淨
2. 煮煲熱水, 水滾後放入大蝦灼10秒左右, 撈起馬上浸冰水備用
3. 呂宋芒起肉切條, 小青瓜切絲
4. 預備一碟暖水, 將米紙浸一浸暖水拿起, 用廚房紙抹乾, 即可包入大蝦, 芒果及青瓜絲 (可加少量蛋黃醬)
5. 上碟並配搭泰式酸辣汁食用

P.S.
1. 我用過藍象米紙及雜貨店既越南米紙, 覺得雜貨店的比較薄身D, 仲有...價錢平D!
2. 浸米紙唔洗等到軟晒先拎起, 趁仲有少少挺身時就要離水, 如果唔係, 包包下塊米紙就會爛.

無水咖哩牛肋肉

前2日開左樽藍象黃咖哩, 想快快趣趣用左佢, 咁岩屋企有牛肋條同蕃茄, 於是就買多個洋蔥整無水咖哩! 無水煮原汁原味, 張生都大讚~~

材料:

牛肋條 1磅
大蕃茄 2個
洋蔥 1個

藍象黃咖哩醬 1大匙 (約50g)
花奶 3湯匙
冰糖 1小塊
鹽 半茶匙

用具:
LC 20cm round (無水煮既菜式最好用鑄鐵鍋!)

做法:
1. 牛肋條切件出水後瀝乾備用
2. 蕃茄及洋蔥切件
3. 細火燒熱鑄鐵鍋, 加入適量油炒香洋蔥

4. 之後舖上三份二既蕃茄, 最面就放牛肋肉, 加蓋轉最細火煮10分鐘
5. 10分鐘後加入冰糖, keep住用最細火煮50分鐘
6. 之後加咖哩醬及鹽, 兜勻後再加蓋煮20分鐘
7. 最後加埋餘下既蕃茄同花奶, 熄火加蓋焗多十分鐘就完成

泰式咖哩炒蟹

好耐冇POST過食譜啦! 前排身體唔係咁好, 一直都冇update個blog~~但尋晚整左個泰式咖哩炒蟹 (係我十分喜歡的藍象咖哩!), 張生大讚好似出街食咁! 激發起我分享既決心~~於是今日馬上要update!

材料:
肉蟹 一斤-斤半
藍象黃咖哩 70g
洋蔥切件 1個
青椒切件 半個 (可省略, 只不過我之前用剩先至用埋去)
雞蛋2隻 (打勻)
細花奶 1罐
紹興酒 1湯匙
魚露 1茶匙
黃糖 3茶匙 (可用白砂糖代替)
水 60ml
雞湯 100ml
生粉, 油 適量 (蟹走油用)

做法:
1. 肉蟹洗淨斬件, 蟹箝略拍
2. 燒滾一鑊油, 蟹件沾上適量生粉走油, 再用廚房紙吸一吸油 (油一定要夠滾, 約45秒左右)
3. 中大火燒熱鑊加入4湯匙油, 再加黃咖哩醬炒勻
4. 加水及洋蔥兜勻, 然後加入蟹件, 再圍邊加紹興酒炒勻
5. 加青椒, 魚露及糖略炒, 放雞湯加蓋煮3-4分鐘
6. 打開蓋後轉細火, 加入蛋漿快手兜勻, 最後加入花奶略炒即可上碟

P.S.
1. 如怕太油膩可skip step 2
2. 加入蛋漿後一定要快手兜勻, 如果唔係好易變一舊舊蛋

無水韓式牛肋肉

也實在係太耐冇update啦! 因為上個月真係好忙, 唔係冇煮野食, 只係煮完都冇時間放上blog! 11月開始要再努力D先得!

尋晚張生唔晌度, 可以有多D時間準備今晚既餸, 所以就炆定個牛肋肉, 今晚返到屋但煲飯炒菜就食得! 韓式牛肋肉也實在係太易煮太方便, 也沒有什麼技巧 (只要唔煲燶就得啦~), 好岩呢排咁忙碌既我!

材料:
牛肋肉 1.5磅
紫洋蔥 1個
白蘿蔔 半條
甘筍 3-4條 (視乎大小)
蒜頭 8粒
韓國梨 1個
韓式牛肉醃醬 10湯匙
麻油 少許

做法:
1. 牛肋肉出水後切件, 紫洋蔥, 白蘿蔔, 甘筍去皮切件, 韓國梨去皮切幼粒或磨蓉備用
2. 加1.5湯匙油落鍋, 油滾後加紫洋蔥及蒜頭炒香

3. 當紫洋蔥及蒜頭炒至有香味, 可加入牛肋肉及一半韓式牛肉醃醬炒勻

4. 之後加入白蘿蔔, 甘筍, 剩下的韓式牛肉醃醬以及麻油繼續炒勻

5. 最後加入韓國梨幼粒, 蓋上鍋蓋, 用極慢火炆1-1.5小時即成 (其間可開蓋幾次攪拌)

P.S.
1. 牛肋肉出左水之後先切件, 係避免出水後縮得太細粒既情況出現, 出左水之後已經收縮左, 咁樣切既時候, 個size就會唔再點變
2. 用LC/STAUB鍋, 因傳熱及鎖水功能較佳, 所以可以完成唔洗加水去煮, 水份除左係黎自韓式牛肉醃醬, 其餘就係本身食材既水份. 如果唔用鑄鐵鍋, 可以勺量加返少少水.

泰式粟米生菜包

尋日又去左SOGO買左藍象 (blue elephant), 新C坑既我就緊係急不及待試下啦~~咖哩以前都有用開就無謂整, 反而個泰式羅勒拌炒醬就覺得好有趣, 好多網友都話用黎炒肉碎拌飯好好味, 所以我就用黎炒肉碎再加D粟米整生菜包 (多菜多益以為冇咁肥, 自我感覺良好中....)

材料:
梅頭半肥瘦 半斤
粟米粒 1碗
西生菜 1個
紅蔥頭 2-3粒

醃料:
生抽 1.5湯匙
糖 1茶匙
雞粉 1茶匙
麻油 1.5茶匙
胡椒粉 少許

調味料:
藍象泰式羅勒拌炒醬 2茶匙
雞粉 1茶匙

做法:
1. 梅頭肉洗淨剁碎, 加入醃料醃半小時
(梅頭肉可以叫豬肉榮幫你攪碎, 我自己就懶醒諗住自己剁, 但剁左幾下已經有點累, 想開廚師機攪碎....但廚師機都忙緊攪麵包, 唯有繼續頂硬上, 結果如圖, 剁得唔夠碎...=.=)

2. 西生菜洗淨瀝乾水備用, 紅蔥頭切碎
3. 先將紅蔥頭爆香, 加入豬肉碎炒至半熟, 之後加入粟米粒兜勻, 再加入調味料, 炒至豬肉熟透便可上碟, 食用時拌以西生菜一起進食.

藍象泰式羅勒拌炒醬

P.S.

呢個recipe係略偏濃味, 因為西生菜本身冇咩味, 配上呢個肉碎就岩岩好, 如果只係想用肉碎黎撈飯既話, 可能就再自行減少調味料同埋醃料既份量

紅咖哩荔枝燴鴨胸

今次專登揀左煙鴨胸黎煮, 食既時候除左濃郁既咖哩味, 仲有陣陣煙薰味, 好有層次呀! 而且仲要加左D水果(荔枝)入去...感覺好似好健康咁~~:)

材料:
煙鴨胸 2條
小甘筍 3條
薯仔 (中-大 size) 1個
蕃茄 (中size) 3個
泰國茄子 6隻
荔枝(去核) 隨意
藍象紅咖哩 70g
椰漿 400ml

做法:
1. 所有蔬菜配料洗淨切件備用
2. 煙鴨胸解凍洗淨抹乾後, 先煎香鴨皮一面至出油

3. 之後再煎另一面, 夾起切件, 鴨油留在鍋中備用

4. 將紅咖哩醬放入鴨油中炒香, 之後加入1/3椰漿, 炒到出咖哩油, 之後可以分幾次加入剩下的椰漿

5. 加入所有蔬菜配料 (荔枝除外) 在咖哩汁中炒勻, 再放入鴨胸, 慢火加蓋煮20分鐘
6. 20分鐘後再加入荔枝拌勻, 右蓋煮多5分鐘即成

配上青菜又一餐了!

P.S.
1. 怕太辣的, 可將70g紅咖哩醬改為50g, 或者將400ml椰漿加至500ml, 若果嫌不夠刺激的, 可以加上一隻指天椒
2. 蔬菜配料很隨意, 今次用既小甘筍及薯仔也是雪櫃中的"剩餘物資", 如果有洋蔥的也可加在一起, 但一定要有蕃茄, 因為蕃茄的甜度可中和咖哩本身的辣

泰式粉絲蝦煲

尋日諗左成朝都唔知整咩餸好,
於是上網係咁睇~~
見到玻璃朱既泰式粉絲蝦煲食譜,
心諗....好似除左蝦之外, 其他材料屋企都有喎!
就決定整呢個, 炒多個菜就OK!!!
(基本材料係follow玻璃朱既食譜, 係調味既部份自己adjust左)

材料:
海蝦  半斤(視乎大小, 今次既蝦唔算大, 半斤有11隻)
泰國粉絲  2小包(泰國粉絲個樣係比較黃的, 但食落比普通龍口粉絲彈牙!)

配料:
肥豬肉  幾舊 (細細舊就得)
辣椒  2隻(切粒)
芫茜根  7條 (原食譜要8條, 但我係買左一札, 切晒D根出黎, 冇真係特別去數)
紅蔥頭  4粒
白胡椒粒 1茶匙
薑  2-3片
芫茜 1棵 (切碎)

調味汁材料:
花雕 2湯匙
老抽 半湯匙
蠔油 1湯匙
雞湯 120ml
魚露 1湯匙

架生:
Staub 18cm round cocotte

做法:
1. 海蝦洗淨去腸, 剪鬚及頭的尖尖位

2. 洗淨及預備所有配料, 粉絲浸軟身

3. 肥豬肉先落鍋爆到出油

4. 之後落晒所有配料炒香 (芫茜碎除外)

5. 聞到配料既香味之後, 可以落海蝦一齊炒, 炒到見到D蝦攣起同埋變左色, 就夾起D蝦先

6. 之後放粉絲落鍋 (配料盡量墊底), 再放返蝦晌面, 淋上調味汁材料, 蓋上煲蓋煮至粉絲吸晒D汁

7. 最後排返靚, 加埋芫茜碎, 熄火焗多陣就完成

煮埋個菜就開得飯!

你睇下, 條條粉絲都好乾身呀, 仲要冇黐底!

但好可惜, 整完一大輪, 老公先話唔返黎食飯!!!!!!!!

冬瓜花蛤肉片湯 + 無水咖哩牛肋肉

前晚捱夜睇波, 尋晚決定是是但但煮D野, 滾左個冬瓜花蛤肉片湯, 呢個湯消暑下火, 味道真係好好好清甜~~如果想再簡單D, 用個湯黎整泡飯食都得!

上星期晌上環買左D花蛤乾, $58一斤, 都幾大隻, 陣味仲好香...好可惜, 只適宜用黎出味, 因為都幾多沙 (幾乎隻隻都有沙)...唔建議食囉~~

冬瓜花蛤肉片湯 (3-4人份)
材料:
冬瓜1斤
瘦肉約200g
花蛤乾約20隻
薑 3片
水 2L

做法:
1. 冬瓜洗淨去皮去籽切件
2. 瘦肉洗淨切片
3. 花蛤乾用清水浸一浸 (約5分鐘左右就得)
4. 水放薑片煮滾, 之後放晒所有材料, 用慢火滾約20-25分鐘, 最後用鹽調味便可

(如果想食埋花蛤肉, 又或者買唔到花蛤乾, 都可以用新鮮花蛤代替, 但記得要吐沙!)

只係一個湯加飯係滿足唔到我同張生的, 所以, 同場加映, 無水咖哩牛肋肉! 又係清雪櫃之作, 真係要耐唔耐清下個雪櫃, 先有更多既空間買新野試!!

呢個咖哩既特色係完全冇加過水, 只用了少量椰漿, 其他既水份係來自食材既本身. 而用既藍象curry paste, 係之前托朋友晌泰國買, 呢一款massaman curry, 味道比較溫和微辣, 如果鍾意辣D既, 可以用red curry paste或yellow curry paste代替

無水咖哩牛肋肉
材料:
牛肋肉 6-7條 (視乎長短, 總之總共可切成十幾小塊就OK)
蕃茄2個 (中size)
薯仔1個 (大size)
藍象massaman curry paste 1包 (70g)
椰漿200ml
(留意返, curry paste包裝係用400ml的, 但呢個咖哩只係用200ml!!!)

架生:
Staub 23cm oval cocotte

做法:
1. 牛肋肉解凍後, 切成小件拖水, 瀝乾備用
2. Staub凍鍋落油, 慢火加熱, 之後加入curry paste炒香
3. 椰漿分3次落, 每次落完都要兜勻, 炒至有咖哩油出.
4. 咖哩同椰漿炒勻後轉最細火, 先加牛肋肉晌底兜一兜, 之後中間果層放薯仔, 最面一層放蕃茄, 然後冚蓋煲10分鐘.
5. 10分鐘後開蓋, 兜勻所有材料, 再冚蓋煮多20分鐘就得

韓式人蔘雞湯

為左表揚張生晌我生日整左2個美味Pizza, 所以我都要有誠意咁整返個韓式人蔘雞湯作回禮.....(禮尚往來嘛!)

材料: (2人份)
春雞1隻
鮮人蔘1條
紅棗5粒 (去核)
薑 3片
杞子 1.5湯匙
糯米 半碗
米酒 2湯匙
鹽 少許
蒜頭2粒 (去衣, 略拍)

架生:
Staub oval cocotte 23cm
牙簽 幾支

做法:
1. 將所有材料洗淨備用, 尤其鮮人蔘, 因為通常會黐住好多泥

2. 將鮮人蔘和糯米塞入雞腔內

3. 用牙簽將雞腔封住, 避免糯米走出黎~

4. Staub鍋內舖上蒜頭, 紅棗, 杞子及薑片, 之後放雞, 淋上米酒, 之後注入清水 (份量大約去到側邊的界線位)

5. 一開始打開蓋用中火煮滾, 之後蓋上煲蓋用極細火煮1.5小時, 之後可加少少鹽調味
6. 完成後, 可從雞中間劏開, 讓糯米流出來

P.S.
1. 糯米煮之前, 起碼要浸3小時以上, 否則糯米芯好可能會唔熟
2. 喜歡食栗子既朋友, 可加埋栗子入去煮
3. 因為得我同張生2個人食, 所以用了春雞, 如果多D人食, 可改用光雞