意式香草包

呢款麵包TAL尤其喜愛, 因為口感比較濕潤鬆軟, 就算隔左夜都唔會變乾變硬嫁! 點橄欖油同黑醋黎食真係一流~~

材料:
高筋粉 250g
即溶酵母 5g
糖 1/2茶匙
鹽 1/2茶匙
水 160g
橄欖油 15g
黑椒 1/2茶匙
意式雜錦香草 1湯匙

(另備手粉!!!)

做法:
1. 將高筋粉, 糖, 鹽及酵母加入水及橄欖油攪拌 (記得酵母唔可以直接碰上鹽, 通常TAL會在麵粉中挖個洞放鹽, 蓋好之後才放酵母在上面呀!)

2. 拌勻後加入黑椒及香草搓勻

3. 搓好後可以搓圓, 蓋上保鮮紙發酵約1小時 (可以拉到薄膜就係搓好啦~)

4. 發酵好後可以排氣靜置10分鐘 (要測試係唔係發酵好, 可用手拍篤入麵糰, 沒有回彈為之發酵完成)
5. 靜置期間可以準備焗盤, 舖好牛油紙 (如果冇牛油紙, 可以在焗盤上薄塗橄欖油)
6. 將麵團搓成約為焗盤的形狀, 繼續發酵30分鐘
7. 呢個時候, 可以準備香草包既配料, 可隨意配上蕃茄乾, 洋蔥, 黑橄欖等, 今次TAL就用了蒜茸+香草

8. 在完成發酵前10分鐘預熱焗爐200度
9. 完成發酵後, 在麵團上塗上配料

10. 入爐15分鐘, 大功告成!

鎮江肴肉

TAL作為一個知慳識儉既師奶仔, 好多野都會自己晌屋企試整, 因為晌出面食實在太貴! 其中一味就係鎮江肴肉, 呢個冷盤晌出面食, 幾十蚊細細碟, 真係好唔化算, 但自己晌屋企整, 幾十蚊就整到一大盤啦~~~不過就要花少少時間! (其實大部份既時間都係"等"~~)

材料:
急凍咸豬手1隻
白醋2湯匙
白胡椒粉1-2湯匙
薑3片
魚露1茶匙
鹽1/2茶匙
雞粉1/2茶匙
紹興酒1茶匙
魚膠粉1盒 (50g)

做法:
1. 咸豬手解凍洗淨, 記得要清理好豬毛 (如有的話)

2. 煲滾一煲水 (份量要足夠蓋過豬手), 加入白醋再放入豬手出水約15分鐘

3. 豬手瀝乾水份搽勻胡椒粉

4. 準備另一煲水 (份量也是要足夠蓋過豬手!) 加入豬手煲大約1.5小時
5. 完成後把豬手撈起, 湯汁要留起600ml備用, 先處理豬手

6. 將豬手起皮, 皮放置於容器底部 (要留意豬皮未夠林的話仍然有彈性的, 所以未必會乖乖俾你舖好一層咁, 呢個時候可以放隻配壓一壓塊豬皮)

7. 豬手肉切粒, 筋位唔要, 放置在豬皮上

8. 之後就要準備層"啫喱"啦...將頭先預留既豬手湯汁翻熱後分成2份, 1份用黎開魚膠粉, 另1份就加入魚露, 鹽, 雞粉及紹興酒, 之後再加入魚膠粉湯汁拌勻

9. 將部份已拌好的湯汁加入豬手中, 份量係剛剛蓋過豬手肉粒, 之後蓋上保鮮紙, 並且放置重物壓一壓, 方便定形, 放入雪櫃雪1.5小時

10. 之後取出準備加入剩餘的湯汁, 呢個時候應該會見到肴肉岩岩係處於凝固既狀態, 就可以加埋剩餘的湯汁, 再放入雪櫃雪過夜
11. 翌日可用刀仔沿容器四邊劃, 翻轉容器肴肉會順利甩模, 便可切件上碟了

(建議如果一次過食唔晒, 可將一盤分開幾件先, 之後未食既真空包裝左去放晌雪櫃, 可以KEEP到3-4星期的)

醉雞翼。醉鴨舌

基本上呢個食譜, 真係鍾意醉咩都得...今次我就用左雞翼同鴨舌 (因為家人都比較鍾意食呢兩樣野)...TAL亦試過用黎整雞腎, 味道一樣OK! 但要記住, 個汁只可以用一次, 浸第2次時個味已經會淡左好多嫁啦!

材料:
雞翼2磅
急凍鴨舌1包
薑6-8片
糟鹵1.5-2支
杞子1湯匙
花椒八角適量
冰糖3-4粒

做法:
1. 先將雞翼及鴨舌解凍, 杞子用1-2湯匙水浸泡
2. 煲滾一鍋水, 加入3-4片薑, 雞翼及鴨舌, 晌呢個時候預備一大碗冰水
3. 鴨舌應該會先熟過雞翼, 所以要先扎鴨舌撈起放入冰水中

4. 大約過多5分鐘, 撈起雞翼放入冰水 (呢個動作係為左令肉質唔會over-cook, 同時食既時候會比較爽脆)

5. 準備另一個煲, 加熱後加入少許油, 之後加花椒八角及剩餘既薑片爆香 (留意要用慢火, 避免花椒八角爆燶!) 之後熄火加入一支糟鹵

6. 加入已瀝乾水的雞翼及鴨舌, 再慢慢加入另一支糟鹵, 直到糟鹵剛蓋肉面, 最後加入杞子放入雪櫃浸泡一夜即成

冰釀蕃茄

夏天開胃前菜之選, 建議最多只浸24小時, 否則話梅味會蓋過晒蕃茄味呀!

材料:
車厘茄2磅
話梅約20粒
冰糖適量
醋或檸檬汁適量

做法
1. 車厘茄徹底洗淨去蒂

2. 之後在車厘茄表面用刀仔輕輕劃十字, 方便稍後去皮

3. 用滾水稍灼一下車厘茄, 大約45秒至1分鐘, 之後瀝乾備用 (保留浸蕃茄的水呀!)

4. 煲滾浸車厘茄既水, 加入話梅, 煲到話梅軟身, 便可加入冰糖及醋調味 (如果冇醋, 可以用檸檬汁代替) 味道因人而異, 要KEEP住試味呀

5. 調配好話梅汁就盛起放涼

6. 等待話梅汁涼的時候, 可以將車厘茄去皮, 最後就可放入話梅汁中浸泡 (話梅汁一定要放涼後才可加入車厘茄, 否則很容易將車厘茄浸熟, 會影響吃的時候既口感)

威靈頓牛柳

基本材料:
牛柳 1.5lb (最好圓筒形一條過)
現成酥皮 2塊
風乾火腿 1包 (最好揀厚身D既)
蘑菇 400g

蛋皮材料 (可省略):
蛋 2隻
麵粉 1湯匙
鮮奶 半杯

調味:
蒜茸 1湯匙
鹽 少許

醃料:
英式黃芥末 3湯匙
鹽 2 1/2茶匙
黑椒 適量

準備時間: 1天
製作時間: 3小時

做法:
1. 將牛柳洗淨後, 放於雪櫃吹乾一晚 (如時間不足夠, 可省略此步驟, 這個步驟係為左令牛柳排去弘餘水份, 增加牛肉味)

2. 牛柳風乾一夜後取出, 加鹽及黑椒煎封四邊, 趁熱塗上芥末醬待涼備用

3. 蘑菇洗淨切碎, 用慢火炒香蒜茸後加入蘑菇, 其間要不斷兜炒, 令水份完全蒸發, 之後放涼備用 (如果炒完之後仍覺得蘑菇有D濕, 可用煮房紙印乾)

4. 之後將所有蛋皮材料拌勻, 煎成蛋皮 (蛋皮有助吸收多餘水份, 但可省略, 不影響味道的!)

5. 在保鮮紙上先舖好風乾火腿, 之後就舖蘑菇茸, 再放上牛柳包好, 之後放入雪櫃雪15-20分鐘 (要包得實D)

6. 將酥皮"碌"成長方形 (足夠包好牛柳的長度), 舖上蛋皮, 取出牛柳用酥皮包好 (記得要包實D!) 再放入雪櫃15-20分鐘

7. 焗爐預熱190度, 取出牛柳, 在表面塗上蛋液, 界好花紋, 放入爐焗
40分鐘即成

豉汁排骨煲仔飯

STAUB鑄鐵煲, 我常用既廚具~~係自從上年萬寧有活動換購開始, 已令我深深愛上, 因為真係好好用....而呢個煲仔飯, 亦都係我常煮的, 因為太方便, 快靚正, 烚埋菜既簡簡單單又一餐!

材料:
白米1杯
水1杯
腩排250G
蔥花適量
煲仔飯豉油適量

醃料:
生抽2湯匙
糖, 鹽, 豆粉各1茶匙
豆豉, 蒜茸適量
指天椒1隻切碎 (視乎口味喜好)

做法:
1. 腩排洗淨, 加入醃料醃最少15分鐘
2. 白米及水加入STAUB 18CM ROUND, 中火煮滾後轉細火, 差不多收水時, 加入腩排加蓋煲10分鐘, 之後熄火再焗10分鐘
3. 灑上蔥花及煲仔飯豉油即成

另外煲仔飯豉油亦可DIY
材料:
上湯1/4杯
糖2茶匙（亦可改用小塊冰糖）
生抽1/4杯
老抽2湯匙
做法:
先將上湯煮至微滾，加糖，拌煮至糖溶化，加入生抽和老抽煮滾便成。

梅酒制作

幾個月前既作品~~(應該係3-4月左右)

材料:
青梅2磅
冰糖1磅 (可再酌量調整)
日本清酒/中國白酒 2L

做法:
1. 將玻璃樽洗乾淨 (最好消毒埋啦!) 記得用之前要徹底抹乾, 唔可以有水份
2. 青梅洗乾淨並除去蒂 (在水盤中加少少梳打粉, 將青梅浸一陣, 再捽下D青梅, 可以幫助除去面果D白色毛毛)
3. 風乾青梅, 確保每一粒都冇水份在表面
4. 青梅用叉/牙簽"吉"幾下, 放入樽內 (令到梅液滲出!)
5. 加入冰糖&酒, 密封好存放於陰涼地方

呢杯係今年浸泡的, 尋日拎出黎試味...DIY真係令我覺得好飲過CHXYA呀!!! (雖然其實應該要再浸耐D)

新張大吉!!!

無啦啦又學人寫BLOG~~~

係! 因為人愈大愈冇記性, 所以要將煮過而又覺得好食既RECIPE寫低, 用過而又覺得好用既產品記低...公諸同好之餘, 亦方便自己日後返兜!!!

要努力~~不要做懶惰貓呀!