古早味蛋糕

呢排我好鍾意整古早味蛋糕, 冇牛油, 只用植物油, 感覺健康D! 而且質地好濕潤, 一D都唔會乾爭爭, 忍不住食完一件又一件!

材料:
植物油 50g (我用芥花籽油/ 橄欖油)
鮮奶 40g
蛋黃 4隻
低筋麵粉 60g
砂糖 50g
蛋白 4隻
幼鹽 1/4茶匙

做法:
1. 用最細火將植物油煮熱 (煮到有油紋就得, 唔好太熱), 之後加入低筋麵粉攪拌

2. 之後加入蛋黃及鮮奶攪拌, 攪拌完成後應該係糊狀, 如果油太熱的話, 攪拌出來會變成麵糰, 咁就整唔到嫁啦!

(完成攪拌後既形態)

3. 蛋白加鹽攪拌到起泡, 然後加糖打至企身, 將1/4既蛋白加入蛋黃麵糊內拌勻

4. 將麵糊倒入剩餘的蛋白內拌勻, 同時焗爐預熱150度
5. 將拌好的麵糊倒入模, 用水浴法焗60-70分鐘

6. 出爐啦....(今次爆左, 上次整得靚仔D!)

自家醃漬酸蘿蔔

材料:
白蘿蔔  適量 (我冇特別check蘿蔔幾重呀, 但大約係4個細個紅皮白蘿蔔!)
鹽  2茶匙

調味:
白米醋  500ml
砂糖  250g
鹽  1茶匙
(此配方係偏酸的, 如果想甜D, 可以自行增加砂糖份量)

做法:
1. 白蘿蔔切條, 加鹽拌勻後放置一旁等佢出水 (約一小時)
2. 將所有調味拌勻, 用細火煮至砂糖溶化後熄火待涼
3. 一小時後, 將白蘿蔔揸乾水份放入玻璃瓶中, 之後加入調味即可
(最少要浸一晚, 等蘿蔔可以入味D)

桃膠杏仁露

養顏養顏養顏...食完即刻覺得好滋潤呀!!!

材料:
龍皇杏/ 大南杏  半斤
北杏  1兩
鮮奶  500ml
冰糖/ 砂糖  適量
桃膠  十幾粒

做法:
1. 杏仁及桃膠浸過夜, 之後隔水, 杏仁水要留起, 桃膠要清雜質
2. 杏仁要逐少放入攪拌器打碎, 大約分3-4次打, 1碗杏仁加碗半水左右, 先用浸杏仁既水, 用晒之後就用凍滾水

3. 將杏仁漿倒入魚袋隔去杏仁渣, 次後可加桃膠及鮮奶用慢火煮 (邊煮邊攪拌)

4. 大約煮15分鐘左右加冰糖, 我大約加了200g左右, 熱食略甜, 但凍食就岩岩好

P.S.
1. 如果唔食桃膠, 可以唔落--->普通杏仁露
2. 可唔落桃膠改落蛋白--->蛋白杏仁茶, 於加冰糖後加入蛋白, 隨即熄火攪拌至蛋白凝固即可

西檸雞

受阿爺廚房影響, 一連幾日都係咁整鼎爺既餸, 尋晚仲整左西檸雞, 雖然冇跟足鼎爺既步驟, 但都好好味, 酸酸甜甜咁, 好下飯好開胃~而且用料簡單, 晌屋企都好易整到! (當然我冇鼎爺咁pro啦~)

材料:
雞扒 2件
凍滾水 1碗
麥芽糖 1.5湯匙
檸檬汁 適量
生粉 適量

醃料:
糖 1.5茶匙
鹽 1茶匙
油 適量

做法:
1. 雞扒切件加入醃料拌勻, 醃大約半小時
2. 雞件撲上生粉, 落滾油炸熟後撈起 (記住要慢火燒熱D油, 避免太高溫, 外面燶左裡面都未熟透)
3. 用凍滾水煮溶麥芽糖, 之後逐小加入檸檬汁, 調較到自己喜歡既酸甜度 (我自己大約加左一湯匙左右)
4. 個汁煮到開始有D稠既時候, 加入雞件兜勻上碟

香芒大蝦米紙卷

好耐冇update...太懶同太忙...@@...夏日炎炎, 整D冷盤, 香芒大蝦米紙卷配上泰式酸辣汁, 開胃又醒神呀!!!

材料:
大蝦 10隻
呂宋芒 1個
小青瓜 1條
米紙 10片
蛋黃醬 適量 (可以唔加)

做法:
1. 大蝦挑腸後去殼洗淨
2. 煮煲熱水, 水滾後放入大蝦灼10秒左右, 撈起馬上浸冰水備用
3. 呂宋芒起肉切條, 小青瓜切絲
4. 預備一碟暖水, 將米紙浸一浸暖水拿起, 用廚房紙抹乾, 即可包入大蝦, 芒果及青瓜絲 (可加少量蛋黃醬)
5. 上碟並配搭泰式酸辣汁食用

P.S.
1. 我用過藍象米紙及雜貨店既越南米紙, 覺得雜貨店的比較薄身D, 仲有...價錢平D!
2. 浸米紙唔洗等到軟晒先拎起, 趁仲有少少挺身時就要離水, 如果唔係, 包包下塊米紙就會爛.

無水咖哩牛肋肉

前2日開左樽藍象黃咖哩, 想快快趣趣用左佢, 咁岩屋企有牛肋條同蕃茄, 於是就買多個洋蔥整無水咖哩! 無水煮原汁原味, 張生都大讚~~

材料:

牛肋條 1磅
大蕃茄 2個
洋蔥 1個

藍象黃咖哩醬 1大匙 (約50g)
花奶 3湯匙
冰糖 1小塊
鹽 半茶匙

用具:
LC 20cm round (無水煮既菜式最好用鑄鐵鍋!)

做法:
1. 牛肋條切件出水後瀝乾備用
2. 蕃茄及洋蔥切件
3. 細火燒熱鑄鐵鍋, 加入適量油炒香洋蔥

4. 之後舖上三份二既蕃茄, 最面就放牛肋肉, 加蓋轉最細火煮10分鐘
5. 10分鐘後加入冰糖, keep住用最細火煮50分鐘
6. 之後加咖哩醬及鹽, 兜勻後再加蓋煮20分鐘
7. 最後加埋餘下既蕃茄同花奶, 熄火加蓋焗多十分鐘就完成

泰式咖哩炒蟹

好耐冇POST過食譜啦! 前排身體唔係咁好, 一直都冇update個blog~~但尋晚整左個泰式咖哩炒蟹 (係我十分喜歡的藍象咖哩!), 張生大讚好似出街食咁! 激發起我分享既決心~~於是今日馬上要update!

材料:
肉蟹 一斤-斤半
藍象黃咖哩 70g
洋蔥切件 1個
青椒切件 半個 (可省略, 只不過我之前用剩先至用埋去)
雞蛋2隻 (打勻)
細花奶 1罐
紹興酒 1湯匙
魚露 1茶匙
黃糖 3茶匙 (可用白砂糖代替)
水 60ml
雞湯 100ml
生粉, 油 適量 (蟹走油用)

做法:
1. 肉蟹洗淨斬件, 蟹箝略拍
2. 燒滾一鑊油, 蟹件沾上適量生粉走油, 再用廚房紙吸一吸油 (油一定要夠滾, 約45秒左右)
3. 中大火燒熱鑊加入4湯匙油, 再加黃咖哩醬炒勻
4. 加水及洋蔥兜勻, 然後加入蟹件, 再圍邊加紹興酒炒勻
5. 加青椒, 魚露及糖略炒, 放雞湯加蓋煮3-4分鐘
6. 打開蓋後轉細火, 加入蛋漿快手兜勻, 最後加入花奶略炒即可上碟

P.S.
1. 如怕太油膩可skip step 2
2. 加入蛋漿後一定要快手兜勻, 如果唔係好易變一舊舊蛋

意式芝心肉丸

剛過去的星期六, 在家同朋友補祝生日, 整左好幾樣菜式, 全部都係第一次整!

其中我覺得整得最好既係意式芝心肉丸, 之前都試過整肉丸, 但係就整得麻麻, 因為D肉唔夠實, 食落去唔夠彈牙, 今次改善左好多啦! 不過今次既水落得多左少少, 攪到好似整肉丸湯咁, 下次再整可以少返D~~

材料:(約做到20粒肉丸)
牛肉 500g (我晌凍肉舖買左D西冷頭黎整, 出黎效果幾好!)
Parmesan cheese 50g
Parsley 1札
雞蛋 1隻
白麵包 50g
鮮奶 80ml

調味料:
鹽 1茶匙
黑椒 1茶匙
肉豆蔻粉 少許
蒜茸 1茶匙

芝心餡:
Gouda mild cheese / Mozzarella 適量

意式汁材料:
橄欖油 3湯匙
洋蔥 1個
茄膏 1湯匙
Passata di pomodora 1盒 (500g)
水 適量

肉丸做法:
1. 牛肉去筋切粒攪碎 (或可直接買肉碎)

2. 用廚師機將牛肉碎打到起膠

3. 打牛肉既同時, 可將Parmesan cheese磨碎, parsley也要切碎

4. 另外將白麵包搣碎, 加入鮮奶攪成糊仔狀

5. 之後將所有材料及調味料加入牛肉中, 用廚師機中速繼續打勻

6. 將芝心餡用的cheese切粒
7. 牛肉打好後, 可取出適量的牛肉並包入芝士粒, 之後搓圓

8. 將牛肉球肉太略煎後盛起
9. 洋蔥切碎, 在鍋中加入橄欖油, 燒熱後加入洋蔥碎爆香
10. 之後加入肉丸, Passata di pomodora, 茄膏及水, 用慢火煮30分鐘即成.

P.S.
1. 汁料宜剛剛蓋過肉丸, 所以先加Passata di pomodora, 之後才加水去控制水既份量
2. 打肉丸要俾D時間同耐性, 我之前第一次打既時候就係心急得滯, 所以打得唔夠膠, 出黎既效果唔夠實失敗左, 今次係一路打, 一路去處理其他食材, 所以用多左時間打, 所以成功了!
3. 唔好用高溶點芝士做芝心餡
4. 可以邊煮邊試味, 用鹽及喼汁作調味

慢煮香草豬鞍架伴黑醋蘋果茸

買左舊豬鞍架3個星期, 一直都未有機會整...真係太太太太太忙! 星期六終於的起心肝溶左雪, 再用埋鄰居送既香草 (恕我愚昧, 唔知隻香草叫咩名), 掉左落去慢煮, 整埋個黑醋蘋果茸, 味道唔錯, 但好可惜....煮過龍! 略嫌鞋口~~(始終係豬, 內心硬係覺得要浸耐D~@@~下次唔會呢~)

材料:
豬鞍架 2件
香草 適量 (可用rosemary或thyme)
鹽 1茶匙
油 半湯匙

蘋果茸材料:
蘋果 (中size) 1個
黑醋 3湯匙
蘋果醋 2湯匙
糖 1-2茶匙

伴碟:
蘆筍 4條

豬鞍架做法:
1. 豬鞍架溶雪洗淨抹乾備用
2. 香草切碎, 跟豬鞍架, 鹽及油一起放入真空袋中, 之後抽走空氣封口
3. 慢煮2小時 (其實1.5小時已OK!)
4. 取出豬鞍架, 煎香2面即可

**煎完唔洗洗鍋住, 用黎炒埋個蘆筍先!

蘋果茸做法:
1. 蘋果去皮去芯磨茸
2. 平底鍋燒熱, 放入所有材料拌勻, 糖可自行加減至適合自己口味
3. 煮至收汁便可

蘆荀做法:
1. 蘆筍削去面層切段 (面層太老, 食起來會有"渣", 如果用BB蘆筍就可省去此步驟)
2. 燒返熱剛材煎豬鞍架的鍋, 加入蘆筍, 再加入鹽和黑椒調味即可

無水韓式牛肋肉

也實在係太耐冇update啦! 因為上個月真係好忙, 唔係冇煮野食, 只係煮完都冇時間放上blog! 11月開始要再努力D先得!

尋晚張生唔晌度, 可以有多D時間準備今晚既餸, 所以就炆定個牛肋肉, 今晚返到屋但煲飯炒菜就食得! 韓式牛肋肉也實在係太易煮太方便, 也沒有什麼技巧 (只要唔煲燶就得啦~), 好岩呢排咁忙碌既我!

材料:
牛肋肉 1.5磅
紫洋蔥 1個
白蘿蔔 半條
甘筍 3-4條 (視乎大小)
蒜頭 8粒
韓國梨 1個
韓式牛肉醃醬 10湯匙
麻油 少許

做法:
1. 牛肋肉出水後切件, 紫洋蔥, 白蘿蔔, 甘筍去皮切件, 韓國梨去皮切幼粒或磨蓉備用
2. 加1.5湯匙油落鍋, 油滾後加紫洋蔥及蒜頭炒香

3. 當紫洋蔥及蒜頭炒至有香味, 可加入牛肋肉及一半韓式牛肉醃醬炒勻

4. 之後加入白蘿蔔, 甘筍, 剩下的韓式牛肉醃醬以及麻油繼續炒勻

5. 最後加入韓國梨幼粒, 蓋上鍋蓋, 用極慢火炆1-1.5小時即成 (其間可開蓋幾次攪拌)

P.S.
1. 牛肋肉出左水之後先切件, 係避免出水後縮得太細粒既情況出現, 出左水之後已經收縮左, 咁樣切既時候, 個size就會唔再點變
2. 用LC/STAUB鍋, 因傳熱及鎖水功能較佳, 所以可以完成唔洗加水去煮, 水份除左係黎自韓式牛肉醃醬, 其餘就係本身食材既水份. 如果唔用鑄鐵鍋, 可以勺量加返少少水.

桃膠蜜桃燉蜂蜜

進入秋天總是要不停滋潤, 不斷外敷內服...除左敷MASK, 就係要食多D滋潤既食物, 尋晚就燉左個桃膠蜜桃燉蜂蜜, 除左滋潤生津, 強健脾胃, 仲有美肌功效的!

材料 (1個LC盅份量)
蜜桃 半個
桃膠 3粒
蜂蜜 1湯匙 (如不用蜂蜜, 可用冰糖代替)
蓮子, 百合  適量

做法:
1. 桃膠浸發最少8小時, 浸發後去雜質
2. 蜜桃去皮切開 (可切粒或切片)
3. 蓮子去芯, 百合略浸
4. 將所有材料加入燉盅, 注入清水, 燉約1.5小時即可

今次我係用左有蜂蠟既蜂蜜去燉, 所以燉完出黎都係有D蠟質, 可以用普通蜂蜜或冰糖取代, 如果用冰糖的, 可在完成前15分鐘先落, 試下個味先, 再決定落幾多 (因為蜜桃本身都有甜味)

泰式粟米生菜包

尋日又去左SOGO買左藍象 (blue elephant), 新C坑既我就緊係急不及待試下啦~~咖哩以前都有用開就無謂整, 反而個泰式羅勒拌炒醬就覺得好有趣, 好多網友都話用黎炒肉碎拌飯好好味, 所以我就用黎炒肉碎再加D粟米整生菜包 (多菜多益以為冇咁肥, 自我感覺良好中....)

材料:
梅頭半肥瘦 半斤
粟米粒 1碗
西生菜 1個
紅蔥頭 2-3粒

醃料:
生抽 1.5湯匙
糖 1茶匙
雞粉 1茶匙
麻油 1.5茶匙
胡椒粉 少許

調味料:
藍象泰式羅勒拌炒醬 2茶匙
雞粉 1茶匙

做法:
1. 梅頭肉洗淨剁碎, 加入醃料醃半小時
(梅頭肉可以叫豬肉榮幫你攪碎, 我自己就懶醒諗住自己剁, 但剁左幾下已經有點累, 想開廚師機攪碎....但廚師機都忙緊攪麵包, 唯有繼續頂硬上, 結果如圖, 剁得唔夠碎...=.=)

2. 西生菜洗淨瀝乾水備用, 紅蔥頭切碎
3. 先將紅蔥頭爆香, 加入豬肉碎炒至半熟, 之後加入粟米粒兜勻, 再加入調味料, 炒至豬肉熟透便可上碟, 食用時拌以西生菜一起進食.

藍象泰式羅勒拌炒醬

P.S.

呢個recipe係略偏濃味, 因為西生菜本身冇咩味, 配上呢個肉碎就岩岩好, 如果只係想用肉碎黎撈飯既話, 可能就再自行減少調味料同埋醃料既份量

燉湯系列~高麗參石斛陳皮燉湯

材料: (份量為1個LC盅)
高麗參片 4錢
霍山石斛 2錢
北芪 4錢
陳皮 1-2片
豬展肉 2小塊
(張生喜歡食湯渣, 所以用了豬展, 但燉出黎會有少少油, 好似幅圖咁, 如果唔食可以用瘦肉代替)

做法:
1. 豬展肉洗淨出水, 陳皮略浸刮去瓤
2. 將所有材料放入湯盅, 注入熱水燉4小時, 加鹽調味即可

功效:
高麗參補氣健腦, 增強體力, 改善體質
石斛滋陰補虛, 可治脾胃之火
陳皮可以理氣健脾, 化咳止痰

滋潤糖水 + 燉湯

中秋過後, 開始要整多D潤燥既湯水/糖水, 如果唔係個人真係會好DRY! 所以前晚整左燉湯, 尋晚就整左糖水, 慎防DRY爆!

燉湯(1)-北芪黨參淮山燉豬展

材料: 紋黨4錢, 北芪5錢, 淮山4錢, 豬展肉2小塊
做法: 豬展出水, 黨參及北芪剪成小段, 同埋淮山一齊沖一沖水, 之後放晒入燉盅, 注入熱水於盅內燉2小時, 加鹽調味即可
功效: 補氣健脾, 改善氣虛, 增強呼吸道功能及抵抗力, 有助改善鼻敏感及氣管敏感徵狀

燉湯(2)-蓮子百合桂圓燉雞泡膠

材料: 蓮子, 百合, 桂圓各2錢, 杞子1錢, 雞泡膠2小件, 豬展肉2小塊
做法: 豬展出水, 雞泡膠浸軟, 其他材料洗淨, 全部放入燉盅,  注入熱水於盅內燉2小時, 加鹽調味即可
功效: 寧心安神, 清心除煩, 滋陰潤肺, 雞泡膠補氣明目, 有調理女性子宮功效

糖水: 雪梨無花果雪耳無花果糖水

材料: 南北杏3錢, 無花果8粒, 雪梨2個, 雪耳1朵
做法: 雪耳浸至軟身切成小塊, 雪梨去芯切件, 無花果及南北杏洗淨備用, 將全部材料放入鍋中加適量水, 大火煮滾後, 轉細火煮45分鐘, 加入適量冰糖調味即可
功效: 滋陰潤燥, 養肝明目

家常小菜(1)~薑蔥粉絲蟹鍋

又好耐都冇update, 除左懶, 就係因為忙...呢排唔知點解好多野做, 忙到冇時間+冇心機諗煮咩餸~~好彩尋日得閒D, 所以尋晚就整左個薑蔥粉絲蟹鍋, 見個雪櫃又有D蘑菇, 又整左個芝士牛肉焗釀小蘑菇, 再烚多碟菜就可以開飯!

薑蔥粉絲蟹鍋
材料:
肉蟹 1隻 (約1斤)
泰國粉絲 1包
京蔥 1條
薑片 8-10片
蒜茸 1茶匙
炸蒜, 炸蔥頭 各1茶匙 (可以唔加)
肥豬肉 1舊

調味料:
雞湯 150ml
蠔油 1湯匙
XO醬 1湯匙

花雕酒 1茶匙

醃料:
生粉 1湯匙
花雕酒 1湯匙
胡椒粉 1茶匙
雞粉 1茶匙

做法:

1. 肉蟹用刷洗淨, 先斬去蟹箝 (記得唔好拆繩, 連繩斬蟹箝, 如果唔係, 好易俾蟹箝到手) , 拍一拍, 之後蟹身去肺斬件

2. 之後入醃料 (生粉除外) 拌勻
3. 粉絲浸軟, 京蔥切段備用
4. 燒熱鐵鍋加入肥豬肉, 爆到出油之後, 蟹件略拍上生粉煎香 (如果想效果更好, 可直接燒一鍋油將蟹件走油, 但我怕太油膩, 所以用煎的方式)
5. 將蟹件撈起, 原鍋加入京蔥, 薑片及蒜茸炒香
6. 加入粉絲略兜後, 蟹件回鍋兜勻, 再放入所有調味料, 蓋上鍋蓋中火煮到收汁
7. 最後灑上炸蒜及炸蔥頭即成

朋友的生日飯

唔經唔覺, 我的悠長假期就咁就完左, 又係時候返工搵錢了! 放左10日假...我既腦海只係想到係咁煮野食~~而且撞岩中秋節, 做節飯都煮左2餐, 其中仲要有一餐要煮20人飯, 都真係有D辛苦!

上星期六有朋友入黎食飯, 4個人食, 整左4個菜+1個冷盤, 當然係食唔晒~~最後朋友要打包左半隻雞走!

介紹下先:

左上: 青醬炒青口扁意粉

唔知點解影出黎有D似係伊麵, 第一次整都算OK, 做法亦非常簡單,

首先要烚熟D意粉, 之後將解凍左既青口加蒜茸落鑊炒香, 

再將意粉回鑊, 加入一大茶匙既青醬及少許鹽, 兜勻便可上碟

左中: 慢煮豉油雞

阿媽教落生日要有雞! 慢煮煮得十分滑，雞胸都好juicy

首先要洗淨冰鮮雞 (我晌一田買鳳江雞, 幾好食的)

放入真空袋, 加入180ml生抽, 20ml老抽, 水200ml, 30g冰糖, 香葉及薑數片, 蔥頭4粒, 蔥1棵,

之後抽真空seal好, 70度慢煮3個半鐘就可以斬件上碟

左下: 涼拌茄子

幾碟餸中最簡單的一道, 酸酸地又有D辣好開胃, 

洗淨一條茄子後切條, 煮滾一鍋水, 加入2湯匙白醋後加入茄子煮 (其間不時攪拌一下)

煮5分鐘後熄火, 將茄子倒入冰水中冷卻, 之後排好放入雪櫃, 食之前淋上汁料

汁料方面用左豉油1湯匙, 浙醋3湯匙, 糖2茶匙, 麻油2茶匙, 辣椒油(連渣)1茶匙, 蒜蓉1茶匙

(可以一路試味一路adjust)

右上: 洋蔥煙肉芝士烤菇

呢個又係冇咩難度, 將燒烤菇去蒂放晌焗盤上,

煙肉及洋蔥切粒炒香, 釀在燒烤菇中, 

再加上芝士及蛋黃醬焗10分鐘就得 (我用左Parmesan同mozzarella)

右下: 威靈頓牛柳 

整左幾次, 最成功係今次 (總算冇失威吧!?)

秘訣真係在於個蘑菇碎要炒得夠乾身, 

詳情可以參閱返威靈頓牛柳

大功告成的一餐, 衷心祝朋友生日快樂, 同埋快D揀好日子拉埋天窗
(可惜只影了2張相, 唯有下次整既時候補拍)

韮菜煎粿

失驚無神想食煎粿, 二話不說就去買料整, 第一次整不過不失, 煎既技巧可以再好D, 味道也不錯!

材料(皮):
澄麵 200g
糯米粉 1湯匙
生粉 1湯匙
水 220ml
菜油/豬油 1.5湯匙
鹽 1茶匙

材料(餡):
韮菜 200g
半肥瘦豬肉 $15

醃料:
麻油 1.5茶匙
鹽 1茶匙
雞粉 1茶匙
糖 1茶匙
胡椒粉 少許

做法:
1. 半肥瘦豬肉剁碎, 之後加醃料醃半個鐘
2. 水加入菜油/豬油及鹽煮滾後, 撞入澄麵撈勻

3. 加入生粉及糯米粉, 搓成糰至表面光滑, 攤凍備用

4. 韮菜切粒, 灑少少鹽撈勻, 過5分鐘後揸乾水, 拌入豬肉成餡料

5. 取出適量煎粿皮, 包入一湯匙餡料 (每份煎粿皮大約比一粒核桃大少少)

6. 準備平底鍋, 燒滾適量油, 放入包好的粿 (收口面先向下, 之後輕按成餅形), 煎至兩邊金黃即成.

P.S.
煎粿既時候盡可能每個粿之間也留有少少空位 (唔好好似我咁堆得咁密), 如果唔係就會好難翻轉另一邊煎, 同時粿皮熟時會黐埋, 翻轉時好易會穿.