意式芝心肉丸

剛過去的星期六, 在家同朋友補祝生日, 整左好幾樣菜式, 全部都係第一次整!

其中我覺得整得最好既係意式芝心肉丸, 之前都試過整肉丸, 但係就整得麻麻, 因為D肉唔夠實, 食落去唔夠彈牙, 今次改善左好多啦! 不過今次既水落得多左少少, 攪到好似整肉丸湯咁, 下次再整可以少返D~~

材料:(約做到20粒肉丸)
牛肉 500g (我晌凍肉舖買左D西冷頭黎整, 出黎效果幾好!)
Parmesan cheese 50g
Parsley 1札
雞蛋 1隻
白麵包 50g
鮮奶 80ml

調味料:
鹽 1茶匙
黑椒 1茶匙
肉豆蔻粉 少許
蒜茸 1茶匙

芝心餡:
Gouda mild cheese / Mozzarella 適量

意式汁材料:
橄欖油 3湯匙
洋蔥 1個
茄膏 1湯匙
Passata di pomodora 1盒 (500g)
水 適量

肉丸做法:
1. 牛肉去筋切粒攪碎 (或可直接買肉碎)

2. 用廚師機將牛肉碎打到起膠

3. 打牛肉既同時, 可將Parmesan cheese磨碎, parsley也要切碎

4. 另外將白麵包搣碎, 加入鮮奶攪成糊仔狀

5. 之後將所有材料及調味料加入牛肉中, 用廚師機中速繼續打勻

6. 將芝心餡用的cheese切粒
7. 牛肉打好後, 可取出適量的牛肉並包入芝士粒, 之後搓圓

8. 將牛肉球肉太略煎後盛起
9. 洋蔥切碎, 在鍋中加入橄欖油, 燒熱後加入洋蔥碎爆香
10. 之後加入肉丸, Passata di pomodora, 茄膏及水, 用慢火煮30分鐘即成.

P.S.
1. 汁料宜剛剛蓋過肉丸, 所以先加Passata di pomodora, 之後才加水去控制水既份量
2. 打肉丸要俾D時間同耐性, 我之前第一次打既時候就係心急得滯, 所以打得唔夠膠, 出黎既效果唔夠實失敗左, 今次係一路打, 一路去處理其他食材, 所以用多左時間打, 所以成功了!
3. 唔好用高溶點芝士做芝心餡
4. 可以邊煮邊試味, 用鹽及喼汁作調味

慢煮香草豬鞍架伴黑醋蘋果茸

買左舊豬鞍架3個星期, 一直都未有機會整...真係太太太太太忙! 星期六終於的起心肝溶左雪, 再用埋鄰居送既香草 (恕我愚昧, 唔知隻香草叫咩名), 掉左落去慢煮, 整埋個黑醋蘋果茸, 味道唔錯, 但好可惜....煮過龍! 略嫌鞋口~~(始終係豬, 內心硬係覺得要浸耐D~@@~下次唔會呢~)

材料:
豬鞍架 2件
香草 適量 (可用rosemary或thyme)
鹽 1茶匙
油 半湯匙

蘋果茸材料:
蘋果 (中size) 1個
黑醋 3湯匙
蘋果醋 2湯匙
糖 1-2茶匙

伴碟:
蘆筍 4條

豬鞍架做法:
1. 豬鞍架溶雪洗淨抹乾備用
2. 香草切碎, 跟豬鞍架, 鹽及油一起放入真空袋中, 之後抽走空氣封口
3. 慢煮2小時 (其實1.5小時已OK!)
4. 取出豬鞍架, 煎香2面即可

**煎完唔洗洗鍋住, 用黎炒埋個蘆筍先!

蘋果茸做法:
1. 蘋果去皮去芯磨茸
2. 平底鍋燒熱, 放入所有材料拌勻, 糖可自行加減至適合自己口味
3. 煮至收汁便可

蘆荀做法:
1. 蘆筍削去面層切段 (面層太老, 食起來會有"渣", 如果用BB蘆筍就可省去此步驟)
2. 燒返熱剛材煎豬鞍架的鍋, 加入蘆筍, 再加入鹽和黑椒調味即可

無水韓式牛肋肉

也實在係太耐冇update啦! 因為上個月真係好忙, 唔係冇煮野食, 只係煮完都冇時間放上blog! 11月開始要再努力D先得!

尋晚張生唔晌度, 可以有多D時間準備今晚既餸, 所以就炆定個牛肋肉, 今晚返到屋但煲飯炒菜就食得! 韓式牛肋肉也實在係太易煮太方便, 也沒有什麼技巧 (只要唔煲燶就得啦~), 好岩呢排咁忙碌既我!

材料:
牛肋肉 1.5磅
紫洋蔥 1個
白蘿蔔 半條
甘筍 3-4條 (視乎大小)
蒜頭 8粒
韓國梨 1個
韓式牛肉醃醬 10湯匙
麻油 少許

做法:
1. 牛肋肉出水後切件, 紫洋蔥, 白蘿蔔, 甘筍去皮切件, 韓國梨去皮切幼粒或磨蓉備用
2. 加1.5湯匙油落鍋, 油滾後加紫洋蔥及蒜頭炒香

3. 當紫洋蔥及蒜頭炒至有香味, 可加入牛肋肉及一半韓式牛肉醃醬炒勻

4. 之後加入白蘿蔔, 甘筍, 剩下的韓式牛肉醃醬以及麻油繼續炒勻

5. 最後加入韓國梨幼粒, 蓋上鍋蓋, 用極慢火炆1-1.5小時即成 (其間可開蓋幾次攪拌)

P.S.
1. 牛肋肉出左水之後先切件, 係避免出水後縮得太細粒既情況出現, 出左水之後已經收縮左, 咁樣切既時候, 個size就會唔再點變
2. 用LC/STAUB鍋, 因傳熱及鎖水功能較佳, 所以可以完成唔洗加水去煮, 水份除左係黎自韓式牛肉醃醬, 其餘就係本身食材既水份. 如果唔用鑄鐵鍋, 可以勺量加返少少水.

桃膠蜜桃燉蜂蜜

進入秋天總是要不停滋潤, 不斷外敷內服...除左敷MASK, 就係要食多D滋潤既食物, 尋晚就燉左個桃膠蜜桃燉蜂蜜, 除左滋潤生津, 強健脾胃, 仲有美肌功效的!

材料 (1個LC盅份量)
蜜桃 半個
桃膠 3粒
蜂蜜 1湯匙 (如不用蜂蜜, 可用冰糖代替)
蓮子, 百合  適量

做法:
1. 桃膠浸發最少8小時, 浸發後去雜質
2. 蜜桃去皮切開 (可切粒或切片)
3. 蓮子去芯, 百合略浸
4. 將所有材料加入燉盅, 注入清水, 燉約1.5小時即可

今次我係用左有蜂蠟既蜂蜜去燉, 所以燉完出黎都係有D蠟質, 可以用普通蜂蜜或冰糖取代, 如果用冰糖的, 可在完成前15分鐘先落, 試下個味先, 再決定落幾多 (因為蜜桃本身都有甜味)

泰式粟米生菜包

尋日又去左SOGO買左藍象 (blue elephant), 新C坑既我就緊係急不及待試下啦~~咖哩以前都有用開就無謂整, 反而個泰式羅勒拌炒醬就覺得好有趣, 好多網友都話用黎炒肉碎拌飯好好味, 所以我就用黎炒肉碎再加D粟米整生菜包 (多菜多益以為冇咁肥, 自我感覺良好中....)

材料:
梅頭半肥瘦 半斤
粟米粒 1碗
西生菜 1個
紅蔥頭 2-3粒

醃料:
生抽 1.5湯匙
糖 1茶匙
雞粉 1茶匙
麻油 1.5茶匙
胡椒粉 少許

調味料:
藍象泰式羅勒拌炒醬 2茶匙
雞粉 1茶匙

做法:
1. 梅頭肉洗淨剁碎, 加入醃料醃半小時
(梅頭肉可以叫豬肉榮幫你攪碎, 我自己就懶醒諗住自己剁, 但剁左幾下已經有點累, 想開廚師機攪碎....但廚師機都忙緊攪麵包, 唯有繼續頂硬上, 結果如圖, 剁得唔夠碎...=.=)

2. 西生菜洗淨瀝乾水備用, 紅蔥頭切碎
3. 先將紅蔥頭爆香, 加入豬肉碎炒至半熟, 之後加入粟米粒兜勻, 再加入調味料, 炒至豬肉熟透便可上碟, 食用時拌以西生菜一起進食.

藍象泰式羅勒拌炒醬

P.S.

呢個recipe係略偏濃味, 因為西生菜本身冇咩味, 配上呢個肉碎就岩岩好, 如果只係想用肉碎黎撈飯既話, 可能就再自行減少調味料同埋醃料既份量

燉湯系列~高麗參石斛陳皮燉湯

材料: (份量為1個LC盅)
高麗參片 4錢
霍山石斛 2錢
北芪 4錢
陳皮 1-2片
豬展肉 2小塊
(張生喜歡食湯渣, 所以用了豬展, 但燉出黎會有少少油, 好似幅圖咁, 如果唔食可以用瘦肉代替)

做法:
1. 豬展肉洗淨出水, 陳皮略浸刮去瓤
2. 將所有材料放入湯盅, 注入熱水燉4小時, 加鹽調味即可

功效:
高麗參補氣健腦, 增強體力, 改善體質
石斛滋陰補虛, 可治脾胃之火
陳皮可以理氣健脾, 化咳止痰

滋潤糖水 + 燉湯

中秋過後, 開始要整多D潤燥既湯水/糖水, 如果唔係個人真係會好DRY! 所以前晚整左燉湯, 尋晚就整左糖水, 慎防DRY爆!

燉湯(1)-北芪黨參淮山燉豬展

材料: 紋黨4錢, 北芪5錢, 淮山4錢, 豬展肉2小塊
做法: 豬展出水, 黨參及北芪剪成小段, 同埋淮山一齊沖一沖水, 之後放晒入燉盅, 注入熱水於盅內燉2小時, 加鹽調味即可
功效: 補氣健脾, 改善氣虛, 增強呼吸道功能及抵抗力, 有助改善鼻敏感及氣管敏感徵狀

燉湯(2)-蓮子百合桂圓燉雞泡膠

材料: 蓮子, 百合, 桂圓各2錢, 杞子1錢, 雞泡膠2小件, 豬展肉2小塊
做法: 豬展出水, 雞泡膠浸軟, 其他材料洗淨, 全部放入燉盅,  注入熱水於盅內燉2小時, 加鹽調味即可
功效: 寧心安神, 清心除煩, 滋陰潤肺, 雞泡膠補氣明目, 有調理女性子宮功效

糖水: 雪梨無花果雪耳無花果糖水

材料: 南北杏3錢, 無花果8粒, 雪梨2個, 雪耳1朵
做法: 雪耳浸至軟身切成小塊, 雪梨去芯切件, 無花果及南北杏洗淨備用, 將全部材料放入鍋中加適量水, 大火煮滾後, 轉細火煮45分鐘, 加入適量冰糖調味即可
功效: 滋陰潤燥, 養肝明目

家常小菜(1)~薑蔥粉絲蟹鍋

又好耐都冇update, 除左懶, 就係因為忙...呢排唔知點解好多野做, 忙到冇時間+冇心機諗煮咩餸~~好彩尋日得閒D, 所以尋晚就整左個薑蔥粉絲蟹鍋, 見個雪櫃又有D蘑菇, 又整左個芝士牛肉焗釀小蘑菇, 再烚多碟菜就可以開飯!

薑蔥粉絲蟹鍋
材料:
肉蟹 1隻 (約1斤)
泰國粉絲 1包
京蔥 1條
薑片 8-10片
蒜茸 1茶匙
炸蒜, 炸蔥頭 各1茶匙 (可以唔加)
肥豬肉 1舊

調味料:
雞湯 150ml
蠔油 1湯匙
XO醬 1湯匙

花雕酒 1茶匙

醃料:
生粉 1湯匙
花雕酒 1湯匙
胡椒粉 1茶匙
雞粉 1茶匙

做法:

1. 肉蟹用刷洗淨, 先斬去蟹箝 (記得唔好拆繩, 連繩斬蟹箝, 如果唔係, 好易俾蟹箝到手) , 拍一拍, 之後蟹身去肺斬件

2. 之後入醃料 (生粉除外) 拌勻
3. 粉絲浸軟, 京蔥切段備用
4. 燒熱鐵鍋加入肥豬肉, 爆到出油之後, 蟹件略拍上生粉煎香 (如果想效果更好, 可直接燒一鍋油將蟹件走油, 但我怕太油膩, 所以用煎的方式)
5. 將蟹件撈起, 原鍋加入京蔥, 薑片及蒜茸炒香
6. 加入粉絲略兜後, 蟹件回鍋兜勻, 再放入所有調味料, 蓋上鍋蓋中火煮到收汁
7. 最後灑上炸蒜及炸蔥頭即成

朋友的生日飯

唔經唔覺, 我的悠長假期就咁就完左, 又係時候返工搵錢了! 放左10日假...我既腦海只係想到係咁煮野食~~而且撞岩中秋節, 做節飯都煮左2餐, 其中仲要有一餐要煮20人飯, 都真係有D辛苦!

上星期六有朋友入黎食飯, 4個人食, 整左4個菜+1個冷盤, 當然係食唔晒~~最後朋友要打包左半隻雞走!

介紹下先:

左上: 青醬炒青口扁意粉

唔知點解影出黎有D似係伊麵, 第一次整都算OK, 做法亦非常簡單,

首先要烚熟D意粉, 之後將解凍左既青口加蒜茸落鑊炒香, 

再將意粉回鑊, 加入一大茶匙既青醬及少許鹽, 兜勻便可上碟

左中: 慢煮豉油雞

阿媽教落生日要有雞! 慢煮煮得十分滑，雞胸都好juicy

首先要洗淨冰鮮雞 (我晌一田買鳳江雞, 幾好食的)

放入真空袋, 加入180ml生抽, 20ml老抽, 水200ml, 30g冰糖, 香葉及薑數片, 蔥頭4粒, 蔥1棵,

之後抽真空seal好, 70度慢煮3個半鐘就可以斬件上碟

左下: 涼拌茄子

幾碟餸中最簡單的一道, 酸酸地又有D辣好開胃, 

洗淨一條茄子後切條, 煮滾一鍋水, 加入2湯匙白醋後加入茄子煮 (其間不時攪拌一下)

煮5分鐘後熄火, 將茄子倒入冰水中冷卻, 之後排好放入雪櫃, 食之前淋上汁料

汁料方面用左豉油1湯匙, 浙醋3湯匙, 糖2茶匙, 麻油2茶匙, 辣椒油(連渣)1茶匙, 蒜蓉1茶匙

(可以一路試味一路adjust)

右上: 洋蔥煙肉芝士烤菇

呢個又係冇咩難度, 將燒烤菇去蒂放晌焗盤上,

煙肉及洋蔥切粒炒香, 釀在燒烤菇中, 

再加上芝士及蛋黃醬焗10分鐘就得 (我用左Parmesan同mozzarella)

右下: 威靈頓牛柳 

整左幾次, 最成功係今次 (總算冇失威吧!?)

秘訣真係在於個蘑菇碎要炒得夠乾身, 

詳情可以參閱返威靈頓牛柳

大功告成的一餐, 衷心祝朋友生日快樂, 同埋快D揀好日子拉埋天窗
(可惜只影了2張相, 唯有下次整既時候補拍)

韮菜煎粿

失驚無神想食煎粿, 二話不說就去買料整, 第一次整不過不失, 煎既技巧可以再好D, 味道也不錯!

材料(皮):
澄麵 200g
糯米粉 1湯匙
生粉 1湯匙
水 220ml
菜油/豬油 1.5湯匙
鹽 1茶匙

材料(餡):
韮菜 200g
半肥瘦豬肉 $15

醃料:
麻油 1.5茶匙
鹽 1茶匙
雞粉 1茶匙
糖 1茶匙
胡椒粉 少許

做法:
1. 半肥瘦豬肉剁碎, 之後加醃料醃半個鐘
2. 水加入菜油/豬油及鹽煮滾後, 撞入澄麵撈勻

3. 加入生粉及糯米粉, 搓成糰至表面光滑, 攤凍備用

4. 韮菜切粒, 灑少少鹽撈勻, 過5分鐘後揸乾水, 拌入豬肉成餡料

5. 取出適量煎粿皮, 包入一湯匙餡料 (每份煎粿皮大約比一粒核桃大少少)

6. 準備平底鍋, 燒滾適量油, 放入包好的粿 (收口面先向下, 之後輕按成餅形), 煎至兩邊金黃即成.

P.S.
煎粿既時候盡可能每個粿之間也留有少少空位 (唔好好似我咁堆得咁密), 如果唔係就會好難翻轉另一邊煎, 同時粿皮熟時會黐埋, 翻轉時好易會穿.

鳳凰酥

仲有大半個月就到中秋啦, 一直都好猶豫究竟今年好唔好整奶皇月餅, 點知唔知挑起邊條筋, 想試下整鳳凰酥 (即係鳳梨酥再加咸蛋黃)~~第一次整效果算唔錯, 自己整可以控制甜度, 食落唔覺太甜, 而且咸蛋黃可以平衡甜味! 再加埋晌淘寶買到既packing, 真係好似買返黎咁!!

(以下份量大約可做24個鳳凰酥)

菠蘿餡材料: (少甜版)
菠蘿 1個 (連芯)
砂糖 約200g
麥芽糖 1湯匙
牛油 50g
熟糯米粉 50g

餅皮材料:
牛油 250g
糖粉 50g
芝士粉 50g
全脂奶粉 60g
全蛋 2隻
蛋黃 2隻
低筋麵粉 350g
高筋麵粉 50g

其他:
咸蛋黃 6隻
米酒 適量

工具:
4cm*5cm長方形模 24個

菠蘿餡做法:
1. 將菠蘿去皮去釘 (此步驟可請水果店代勞), 之後將菠蘿肉切粒, 菠蘿芯刨絲
2. 慢火燒熱平底鍋, 將菠蘿肉, 菠蘿芯連埋汁全部放入煮到起泡, 之後可以加入砂糖繼續煮 (如果怕太甜, 可逐少加入, 一邊加一邊試味)

3. 當菠蘿開始轉色, 便加入麥芽糖繼續攪拌

4. 開始收汁時, 加入牛油攪拌, 之後逐少加入熟糯米粉兜勻成形如下圖 (50g熟糯米粉可能用唔晒的, 但必須要keep住攪拌避免黐底, 同時逐少落粉, 見到成形後就唔好再落)

5. 餡料攤凍後就可使用

鳳凰酥製法:
1. 咸蛋黃灑上米酒, 放入水波爐用convection mode 150度烤烘10分鐘

2. 牛油置室溫放軟後, 加入糖粉打至變米黃色

3. 加入奶粉及芝士粉繼續攪拌
4. 全蛋及蛋黃打散, 分3次加入

5. 將高筋粉和低筋粉分2-3次篩入牛油混合物中, 用按壓的方式混合 (切勿用搓揉的方式, 避免餅皮起筋)

6. 咸蛋黃每隻一開四備用, 烤盤舖上牛油紙, 放上模具
7. 取出約20g菠蘿餡, 包入1/4咸蛋黃 (共做24份), 如果餡料太黐手, 可用少許熟糯米粉當手粉用
(呢個時候...我冇手影相了!)
8. 餅皮每份約35g, 搓平包入餡料, 放入模具中壓平 (壓好應該岩岩好可以Fill滿晒一個模)

9. 水波爐convection mode預熱170度後, 入爐焗10分鐘, 取出反轉再焗5分鐘, 之後取出甩模放涼

P.S.
1. 甜度可再自行調整砂糖的份量, 嗜甜的可加多D砂糖, 但必須一邊加糖一邊試味
2. 如果唔係經常做烘焙既朋友, 模具可以自己用硬卡紙加錫紙整 (我都係自己整的!) 將硬卡紙剪成21cm*2.5cm長條, 之後用錫紙包住, 再折成4cm*5cm長方形, 突出來的作駁口位, 用釘書機釘住就得

3. 若果不加入咸蛋黃, 便成鳳梨酥了

慢煮BBQ醬燒豬仔骨

有好朋友上黎食飯, 緊係攪D新意思, 試下慢煮18個鐘豬仔骨, 睇下係咩鬼樣先得~~(老友黎食飯當然係要做下白老鼠~~)

材料:

豬仔骨 1.5磅 (大約5-6條骨)

洋蔥 半個

醃料:

BBQ醬 4湯匙

Oregano 2茶匙

紅椒粉 1.5茶匙

蜜糖 1湯匙

蒜蓉 1.5茶匙

做法:

1. 豬仔骨洗乾淨抹乾備用

2. 準備可以慢煮既膠袋, 將所有醃料加入攪勻

3. 將豬仔骨放入袋中, 之後抽真空封口

4. 慢煮機調至70度, 時間set為18小時, 之後可加入豬仔骨開始煮

5. 18小時後, 可將豬仔骨盛起

6. 將洋蔥切條, 舖在skillet或焗盤上, 可加上少許橄欖油, 鹽和黑椒

7. 將豬仔骨從袋中取出, 放在洋蔥上, 慢煮袋中的汁盛起, 先將一面豬仔骨搽滿汁

8. 水波爐調至grill mode, 將豬仔骨放入, 烤10分鐘

9. 10分鐘後, 豬仔骨翻轉另一面, 再搽滿汁, 再烤多10分鐘即成

今晚除左有豬仔骨, 仲有XO醬炒西蘭花, 白灼蝦, 蒸咸蛋, 同埋節瓜薏米蜆仔湯, 大家都食到好飽~~~個骨好juicy, 一D都唔"鞋", 肉質夠淋, 而且好友十分欣賞我既自家制咸蛋, 所以給了2隻她外帶回家, 與家人分享!!

P.S.

1. 墊底的配菜可自行配上, 不一定要洋蔥, 例如可以配上彩椒, 但不建議用上太多汁液既蔬果 (例如蕃茄), 因為太多汁可能會令豬仔骨烤出黎唔夠乾身

2. 如果不嗜甜的, 醃料可省卻蜜糖